Shillong, Naitung 27
Ka lympung ïalehkai SRGT 3rd Division Football League 2025 ba la pynïaid da ka Shillong Sports Association (SSA) ka la nangjam shaphrang ha ka Sngi Saitjaiñ ha SSA Stadium kaba ha First Ground, Polo.
Ha ka jingïalehkai kaba nyngkong hapdeng ka Ïatyllilang SC bad ka Madan S&CC ki la ïasam mar shi point hadien ba ki la ïakhaid mar 2-2 kol.
Ha kane ka jingïakhun ka Madan ka la pynkhih jar nyngkong eh lyngba u Adrian Mewanpynbiang Sawian ha ka minit kaba 13, hynrei hadien shiteng kynta u Domborlang Mukhim (33) u la lah ban pynphai na ka bynta ka Ïatyllilang.
Hadien katto-katne por ba la bteng biang ïa ka jingïakhun jong ka kylla miet ka Madan ka la pynbud biang sa shi kol lyngba u Thang goulun Vaiphei ha ka minit kaba 76. Ha shwa ban wai ka Ïatyllilang ka la lah ban pynphai kylla lyngba u Shwameiaki Kharumnuid (84) na ka bynta ban ïakhaid mar shi kol.
Haba phai sha kawei pat ka jingïakhun kaba ar hapdeng ka Laitlyngkot SC bad ka Umïew Maw U Sam ki la ïakhaid mar 1-1 kol. Ka Umïew ka la pynkhih jar nyngkong eh lyngba u Seiborlang Kharmalki ha ka minit kaba 35, hynrei ka Laitlyngkot ka la lah ban pynïakhaid kylla ha ka kylla miet lyngba u Ribanbha Majaw (63).
Ka jingïalehkai ha ka lah sngi U Blei kan long hapdeng ka Pomlakrai SC pyrshah ïa ka Lawmali SC ha ka por 1:30 mynsngi bad ka Lumparing SC ïa ka Umlyngka SC ha ka por 4 baje nohphai sngi.
