Shillong, Naitung 27
Ka Khadsawphra Colle-ge, Mairang ha ka 25 tarik mynta u bnai ka la pynkup burom ïa ki samla pule kiba la pyndep ïa ka B.A bad B.Com (Hons) naduh ka snem 2022-2025 ha kaba kiba la pass ïa ka B.A ki long 425 ngut bad B.Com ki long 70 ngut.
U Kongsan ha katei ka sngi u dei u Vijay Kumar Mantri, IAS uba dei u Commissioner and Secretary ka Sorkar Meghalaya. Ka Prof. Ibadani Syiem, Controller of Examinations, NEHU, u Bah Macdonald Marbaniang, Direc-tor MBOSE bad Bah M. Diengdoh MCS, ADC ka District Eastern West kum ki Symbud Kong-san.
Ki Kongsan ki la ai ka jingïaroh ïa ka kolej kaba la kiew sted ha baroh ki liang wat la kam pat ïoh kano-kano ka jingïarap na ka Sorkar bad ki khmih lynti ba ka kolej kan nang lah ban ai ka jingshakri kaba kham bha shuh ha ki snem ban wan.
Ki Kongsan ki la pynpaw ïa ka jingkmen ban tip na u Babu Boldness, Principal ïa ka development bad performance jong ka kolej ha kine ki khyndiat snem ha kaba ha ka snem 2017 mynba la sdang ban seng ïa ka, ki la don tang 57 ngut ki samla pule katba mynta ki la don haduh 642 ngut bad ka result ha kine ki snem ka long beit shispah na ka shispah ha baroh ki Hons Subject, lait noh tang mynta u snem (2025) ka long 98.5% ïa kaba ki don ki khynnah kiba hap ban pyndep ïa ki subject kiba pheil ha kiwei ki semester.
Ki la ong ba “Ka Khadsawphra College ka dei kawei na ki ‘private unaided College’ ba bha tam ïa kaba ngi lah ban sakhi na kane ka 2nd Graduation Celebration mynta ka sngi.”
Ha kane ka sngi la ïoh ban sam ïa ka Kitdor Memorial Award ba la ju ai sha ki Topper jong ka kolej bad ïa ki Mtab sha ki klas XII.
Ha kane ka sngi la sam ruh ïa ki syrnod sha baroh ki samla ba la pyndep ïa ki degree da ki Kongsan bad la pynphuh-pynphieng ïa kane ka sngi da ka jingrwai Anthem bad jingrwai Lariti na ki samla pule kane ka kolej.
