Shillong, Naitung 27
Ka Confederation of Ri Bhoi People (CoRP) Sengkmie ha ka 25 tarik Naitung ka la ai da ka jingthoh sha u Deputy Commissioner (DC) ka Ri Bhoi District ban pyntreikam ïa u Pin Code na Meghalaya ha ki shnong kiba dang pyndonkam ïa u Pin code na Assam haduh mynta.
Ha ka dorkhas la pynpaw ba ka seng ka la ïoh ka jingujor na ki samla pule ka thaiñ kiba kynduh jingeh haba ‘apply online’ ha ki jaka pule ne ki scholarship ha jylla, namar u pin code ha ka EPIC ne Aadhaar card ka dei na Assam bad don ruh kiba shah kyntait ban plie account ha ki bank namar ka jingbakla u pin code bad kane ka buh jingeh ïa ki paidbah ka thaiñ Ri Bhoi Sepngi bad kiwei ki shnong ba pyndonkam ïa u pin code 781131 na Assam.
Kumta, ka CoRP ka kyntu ïa ki bor district bad ki bor pynïaid ka post office Nongpoh ban pynbeit noh mardor bad ban pyntreikam ïa u pin code na Meghalaya ban lait na ki jingjia kulmar hadien. Namar ym lah ban tip ïa ki kam buitpoh ka Assam ka lah ban kam wat ïa kitei ki jaka ha ka jingïakren pynbeit pud hapdeng ka Meghalaya bad Assam kaba dang ïaid shakhmat mynta namar ka jingpyndonkam bakla ïa u pin code.
“Ka shnong Patharkhmah ba hap hapoh Hima Nongkhlaw bad ka Headquarter jong ka Western Ri Bhoi Civil Sub Division katkum u pin code ka hap hapoh Assam bad kumjuh ka New Jirang bad Old Jirang ki shnong ba heh hapoh Hima Jirang, kumta kane ka jingbakla ka lah ban ïalam sha ka jingkulmar hadien lada ki bor dei peit kim shimkhia ban pynbeit kloi,” la bynrap.
Ha kajuh ka por ka CoRP ka kyntu ïa ki Rangbah Shnong ka thaiñ ban shimkhia ban pynbeit noh ïa kane ka kam na ka bynta ka jingbit jingbiang jong ki paidbah nongshong shnong ka thaiñ Ri Bhoi Sepngi. Kane ka long katkum ka kyrwoh ba la phah da u Bah Gershome Hat, Vice President bad Bah Markus Makri General Secretary ka CoRP Sengkmie.
