Jowai, Naitung 27
Ki la don haduh 29 ngut ki briew kiba don jingduna ha ki dkhot met kiba la ïoh ïa ki jingïarap kiba kynthup da ki tiar kum ki wheelchair, crutches bad ki tiar ïarap ïa ka bor ïohsngew bad 37 ngut pat kiba la ïoh da ki Niramaya Health Insurance cards ha ka prokram ba la khot pynlong da ka ophis District Social Welfare Officer ryngkat ki bor pynïaid District, West Jaiñtia Hills bad ka Composite Regional Centre for Skill Development Rehabilita-tion Empowerment of Persons with Disabilities (Divyangjan) (CRCSRE, Shillong), Meghalaya ha ka 26 tarik u Naitung ha Lad Mukhla Community Hall, WJHD.
Ha kane ka sngi la ïadon lang u Symbud Myntri Rangbah ka Jylla, Bah Sniawbhalang Dhar, u MLA ka thaiñ bad Chairman ka MUDA, Bah Wailadmiki Shylla, Deputy Commissioner u Abhinav Kumar Singh, IAS, u Dr. Ram Shakal Sahani, Director of CRCSRE, Shillong, Kong Y Najiar, District Social Welfare Officer nalor kiwei pat.
Ha ka jingkren kum u kongsan, u Bah Sniawbhalang u la pynshlur ïa ki briew ba don jingduna ha ki dkhot met kumjuh ïa ki nongsumar ba kin bud ryntih ïa ki kyndon khnang ba kin ïoh ïa ki jingmyntoi ba pura lyngba ki skhim Sorkar.
U la ban jur ruh halor ka jingdonkam ban pynrung kyrteng Aadhaar khnang ba kin ym duh ïa kiba bun ki jingmyntoi, bad u la pynskhem ïa ka jingkut jingmut jong ka Sorkar ban ai jingkyrshan ïa kiba kum kine ki briew.
U la kyntu bad pynshlur ruh ba kin don ïa ka jingmut jingpyrkhat kaba bha bad ban kiew shaphrang da ka jingngeit bad ka jingkut jingmut kaba skhem. U la ban jur ruh halor ka jingdonkam ban bteng ïa ki jingpule jong ki bad ban beh sha ka thong khlem kano-kano ka jingartatien da kaba kular ïa ki halor ki lad jingkyrshan kiba ïai bteng na ka liang ka Sorkar.
Katba, na ka liang u MLA Bah Wailadmiki Shylla u la pynpaw halor ki jingmyntoi kiba kine ki briew ki dei ban ïoh lyngba ki skhim Sorkar. U la buh jingmut kyrpang ruh halor ka jingpynbiang ha kaba ïadei bad ka koit ka khiah lyngba ka Niramaya Health Insurance Scheme kaba don ïa ka bynta kaba kongsan ban pynïoh ïa ki lad jingsumar kiba kot bor na ka bynta jong ki.
U la pynpaw ruh ïa ka jingkordor jong ka pule puthi na ka bynta ki briew kiba don jingduna ha ki dkhot met da kaba kdew ba ka jingnang jingstad ka long u shabi ban long kiba bit ban ïoh kam Sorkar bad kiwei kiwei ki lad ki lynti. U pynshlur ruh ïa ki nongïoh jingmyntoi ban pynleit jingmut ruh ha ka pule puthi namar ka long ka atiar kaba khlaiñ kaba ïalam sha ka jinglong laitluid, ka jingpynkupbor bad ka jinglah ban lah ban ïoh ïa ki kam ki jam kiba don jingmut.
Kumjuh, na ka liang u Deputy Commissioner u Abhinav Kumar Singh u la ban jur halor ka jingdonkam ïa ka jingsngewskhem, ka jinglong laitluid bad ka jinglah ban khih ban ksar na ka bynta ki briew kiba don jingduna ha ki dkhot met. U la bynrap ruh ba lyngba kine ki jingïarap ba ki la ïohpdiang lyngba ka skhim ADIP bad da ka jingkyrshan na ki seng kum ka ALIMCO bad ka tnat Social Welfare la lah ban pynkylla dur ïa kiba bun ki jingim briew.
Ha kane ka jingïalang ba la pynïaid da u Bah H Laloo Supervisor, Social Welfare Department, Jowai la ïoh ruh ka jingkren na u Dr. Ram Shakal Sahani, Director of CRCSRE, Shillong kumjuh ka jingkren pdiang na ka Kong Najiar, DSWO bad ka jingkren ai khublei na u Bah M Thabah, CBRW, Social Welfare Department, Jowai.
