Shillong, Naitung 27
Hadien shibnai tam ka jingplie paidbah ïa ka jaka ïeng kamai ki kali kit nongleit-nongwan jngohkai pyrthei hajan ka Parking Lot ka Meghalaya Urban Development Authority (MUDA) pyrshah ka Anjalee Cinema, Them Ïew Mawlong kiba don ha ka Jongksha Tourist Taxi Owners’ and Drivers’ Association, ha ka 25 tarik u Naitung, 2025, u Bah Banteidor Lyngdoh, MLA ka Mawkynrew u la noh synñiang sha kane ka Synjuk da ki Uniform.
Kane ka jingsynñiang da ka Uniform ka long shibynta ka jingthmu jong ki nongleit-nongwan jngohkai pyrthei kiba shim da kine ki kali kin don ka jingsngew shngaiñ haba ïohi ba kiba ñiah ki dei kiba pyndonkam bad phong da ki Uniform.
Shuh-shuh, kum ban shu kdew ba katei ka jaka ïeng kali kamai ka la urlong da ka jingshimkhia u MLA ha ryngkat ka jingïatreilang bad ka synjuk hi ban ïakren bad ki bor pynïaid District ka East Khasi Hills.
U Bah Banteidor haba kyntu-kynpham ïa ki dkhot bad nongïalam ka synjuk u la ong ba ka Mawkynrew Constituency ka la nangkiew shakhmat ha ka jingdon ki jaka jngohkai pyrthei kiba khring ïa ki nongwan jngohkai kum ka Laitlum, Syntung, Thangsning, Nongjrong bad kiwei-kiwei.
“Ka jingshakri jong phi ïa ki nongwan jngohkai ka dei ka bynta ba kongsan namar kan wanrah ïa ka ïoh ka kot,” la ong u Bah Banteidor da kaba kyntu ruh ba ka kam jngohkai ka kiew ruh lyngba ka akor ka burom la ka long ha ka ktien ka thylliej bad kiwei pat ki bynta.
Da kaba pynpaw ba kane ka Synjuk ka dei kaba nyngkong ba ki nongñiah kali kin pyndonkam Uniform ha ka Jylla, u Bah Banteidor u la ong ba ka dei ka nuksa ïa kiwei pat bad ka pyni ruh ïa ka jinglong kawei bad jinglong ryntih.
