Jowai, Naitung 27
La shi bnai tam ba ki nongshong shnong jong ka Lapangap kim pat ïoh ban leit peit ïa la u kba uba ki la thung bad la shi bnai tam ba ki pulit Assam ki la ïoh pynïeng ïa la ka ktem hapoh u pud u sam jong ka Lapa-ngap bad haduh mynta ki nongshong shnong ki dang thiah ryngkat ka jingsyier ïoh wan pynjulor ki Karbi ïa ki pynthor kba bad ki ïing trep jong ki.
Ka jingshong syier ki nongshong shnong Lapa-ngap ka dei kaba shong nongrim namar ha ka 27 tarik u Naitung, ka la don ka jinghiar thma da ki Karbi ïa ki nongshong shnong Lapangap da ki jri siat sim bad da ka jingbitar ki nongshong shnong Lapangap ki la pynphai lang da ki jri siat sim.
Katei ka jinghiar thma na uwei u lum sha uwei u lum ka la neh kumba 60 minit tam ne duna bad ka la kut hadien ba ki pulit jong ka Meghalaya bad ka Assam ki la beh noh ïa ki paidbah sha la ïing.
Haba ïakren bad u Waheh Shnong ka Lapangap, Bah Deimonmi Lyngdoh, u la ïathuh ba katei ka jingïasiat ka la sdang na ka liang ki Karbi ha ka por ba ki nongshong shnong ki dang thmu ban leit jngoh ïa la ki lyngkha kumjuh ki hali pynthor.
U Bah Deimonmi Lyngdoh u la ong, ka jingdon ka ktem jong ki pulit Assam hapoh u pud u sam jong ka Dorbar Shnong Lapangap ka la wanrah ka jingthut kaba khraw ïa ki nongshong shnong khamtam ki nongrep jong ka shnong Lapangap.
Nangta, u la ïathuh ba ka Dorbar Shnong Lapangap ka la dawa na ka Sorkar Meghalaya ban weng mardor noh ïa kitei ki pulit Assam kiba la pynïeng ktem hapoh u pud u sam ka Lapangap bad ban wanrah da ki shipai CRPF.
