Shillong, Naitung 27
Uwei u tyngshop jong ki phlim Pnar, Bah Ribait-O Pde u la wan mih pyrthei biang ha ka phlim ‘Wa Bakla’ hadien 11 snem ba u la jah na ki kam ak phlim naduh ba la pynduhnong ïa ki nongshna phlim namar ka jingthep tuh ha ki cyber bad mobile phone ha u snem 2014 ha ka por ba dang pynïaid ïa ki phlim da ki CD.
Ïa kane ka phlim ‘Wa Bakla’ la shna bad pynbit pynbiang da ka Kong Phidalia Toi kaba dei kawei ka longkmie ha Jowai kaba ju trei ha ki kam imlang- sahlang ka ban sa pyni pat sha ki paidbah ha 1 tarik, 2 tarik bad 3 tarik u Nailar 2025 ha Iongpiah Hall bad ha 15 tarik, 16 tarik bad 17 tarik u Nailar ha Iungwalieh Panaliar, Jowai.
Ki tyngshop bad ki puron kiba ak ha kane ka phlim ki long u Ribait O Pde, Ivakordor Suchiang, Jiphilrhen War Nongbri, Player Suna bad kiwei.
Ïa kane ka phlim la pyllait paidbah ha New Hill, Jowai ha ka 25 tarik Naitung 2025 ban pyni tang ïa kiba shimbynta, kiba shah khot sngewbha hashwa ban pyni paidbah ha Iongpiah bad Panaliar.
U Bah Ribait O Pde u la sdang ban ak phlim nyngkong ha u snem 2006 ha ka phlim Manisa bad u la ak khatduh ha ka phlim Silet Tamdien ha u snem 2014.
Ban tip kham bniah la ïoh ban ïakren kyrpang ïa u Bah Ribait O Pde uba la pynpaw ba u don ka sap naduh dang khynnah ban ak phlim bad kane ka la urlong ban ak ha ka phlim Manisa.
U la pynpaw ba naduh ba u la sangeh ban ak phlim u ju mutdur ba lano ki kam ak phlim kin kiew biang bad mynta ka la urlong hadien ba la ïoh ban pyllait paidbah ïa ka phlim ‘Wa Bakla’.
U la kyrpad ïa ki paidbah kiba ju kyrshan ïa u ha kine ki snem ba la leit ba kin wan kyrshan biang da kaba leit peit ïa kane ka phlim.
