Shillong, Naitung 27
Ka Babadam Primary Health Centre (PHC) ha West Garo Hills District ka la ïoh ïa ka jingpynskhem ba pawnam jong ka National Quality Assurance Standard (NQAS) na ka tnat ka kot ka khiah jong ka Sorkar India, kaba long ka mawjam kaba kongsan ha ka jingïaid lynti jong ka jylla sha ka jingshakri ba bha jong ka koit ka khiah ki paidbah.
La pynwandur da ka National Health Systems Resources Centre (NHSRC) hapoh ka Quality Council of India, ka rukom treikam jong ka NQAS ka bishar bniah ïa ki jaka sumar paidbah ha kylleng ka ri halor ki kyndon ba kongsan kum ka jingsumar ïa ki nongpang, ka khuid ka suba, ka jingïada na ki jingpang bad ka jingshakri.
Ka Babadam PHC mynta ka dei ka Primary Health Centre kaba nyngkong eh ha baroh kawei ka thaiñ Garo Hills ban ïoh ïa kane ka jingpynskhem.
Haba pyrkhat halor kane ka jingjop, ka Sr. Riya kaba dei ka Health Program Manager ha Babadam PHC ka la ong, “Kane ka jingithuh ka dei ka jingmih na ka jingkyrkhu jong U Blei, ka jingtrei shitom bad ka jingaiti lut jong ka kynhun jong ngi baroh kawei.”
Ngi ïatreilang ban thaw ïa ka jaka sumar kaba khuid, kaba ïadei bad ki nongpang bad kaba paka. Ka jingpdiang ïa ka jingpynshisha jong ka NQAS ka la pynshlur ïa ngi ban bteng ban kyntiew shuh-shuh ïa ka jingsumar na ka bynta ka imlang-sahlang, la ong ka Riya.
Ka la ong ruh, “Kum ka jaka sumar jong ka Internal Performance Agreement (IPA), ngi la don ka jinglah ban thmu katkum ka jingdonkam jong ka thaiñ, ban ïatreilang kham jan bad ki paidbah bad ban pynkhlaiñ ïa ka jingkitkhlieh jong ki nongtrei. Kata ka la wanrah ïa ka jingkylla kaba shisha ha ka rukom ba ngi ai ïa ka jingsumar pang man la ka sngi.
Ka Babadam PHC ka dei kawei na ki 122 tylli jaka ba la jied katkum ka Internal Performance Agreement (IPA) model, kaba dei ka jingthmu hapoh ka Meghalaya Health Systems Strengthening Project (MHSSP) bad ba la bei tyngka da ka World Bank.
Ka IPA ka dei ka rukom ai pisa kaba pynshong nongrim ha ki jingmih ba la shna ban pynkhlaiñ ïa ki jaka sumar da kaba pynïadei ïa ka jingtreikam bad ka jingai pisa. Ïa ki jaka la bishar bniah katkum ki dak ba la buh lypa, bad kito kiba ïoh ïa ki ‘score’ kiba kham heh ki lah ban ïoh ïa ki lad jingïarap bad jingkyrshan kham bun. Lyngba kane ka rukom, ka jylla ka thmu ban kyrshan ïa kine ki jaka ha kaba ïoh ïa ka jingpynshisha jong ka NQAS, ban pynkhlaiñ ïa ki rukom treikam, ban pynbha ïa ki jingmih, bad ban pynshlur ïa ka jingpynbha ïa ka jinglong kaba dang bteng.
Ka jingjop jong ka Babadam PHC ka pyni ïa ki bnai jong ka jingpynkhreh, ka jingpynkhlaiñ ïa ka bor, bad ka jingpyrshang ban pynbha ïa ka jinglong ba la shim da ka kynhun jong ka PHC ha ka jingïatreilang bad ka Joint Directorate Quality Committee, ïa kaba la seng lyngba ka jingbei tyngka jong ka IPA hapoh ka MHSSP. Ka komiti ka la ai ka jinghikai kaba kongsan bad ka jingkyrshan kaba biang ha baroh kawei ka jingïaid lynti jong ka jingpynskhem.
Kane ka jingjop ka long ka jingpynshisha ïa ka jingaiti jong ki nongtrei ka koit ka khiah kiba hakhmat eh ha ka ban ai ïa ka jingsumar kaba pynshong nongrim ha ki nongpang, wat ha ki jaka kiba jngai tam bad kiba duna ka jingshakri. Ka long ruh kum ka jingai mynsiem ïa kiwei pat ki PHC bad ki jaka sumar ha kylleng ka Meghalaya ban bud ïa ki jingthew jingkheiñ kiba kum kita, kaba noh synniang sha ka rukom sumar paidbah kaba khlaiñ bad kaba lah ban ïeng na ka bynta ka jylla.
