Shillong, Naitung 27
U Symbud Myntri Rangbah ka Jylla, Bah Prestone Tynsong ha ka Sngi Saitjaiñ u la plie paidbah ïa ka ïing dorbar thymmai jong ka Dorbar Shnong Nongshken, kaba hap hapoh ka Raid Nongshken, Khyrim Syiemship.
Ha kane ka sngi plie ïa kane ka ïing dorbar, la ïadon lang ryngkat ka Kong Grace Mary Kharpuri kaba dei ka MDC ka thaiñ, u Rangbah Shnong, ki nongkitkam shnong, ki nongshong shnong bad kiwei-kiwei.
Ïa kane ka ïing dorbar la pynïoh da u Bah Prestone kum MLA ka thaiñ na ka skhim Special Rural Work Programme (SRWP) lyngba ka Pynursla C&RD Block ha ka jinglut kaba kot haduh T.45 lak.
Haba kren kum u kongsan, u Bah Prestone u la ong, “Ka ïing dorbar ka dei kum ka temple ka ban saiñdur ïa ka shnong ka thaw bad ka bit ka biang ka jong ka shnong.”
Haba pynpaw ba u dap da ka jingkmen ban wan plie ïa kane ka ïing dorbar, u Bah Prestone u la ïathuh ba dei ha u snem 2022 ba la lah ban pynurlong ban buh mawnongrim bad mynta la ïoh ban wan plie, bad u la ai khublei ruh ïa ki ar ngut trai jaka kiba la ai jaka ban tei ïa kane ka jaka saiñdur bad u la ai khublei ruh ïa u Rangbah Shnong ban pynurlong ïa kane ka jingangnud jong ka shnong.
“Ban kiew ka shnong ka thaw ha baroh ki liang, u Bah Prestone u la kyntu ïa ki nongkitkam shnong ba ki donkam ban ïatreilang bad u MLA bad ka MDC bad lada kam don satia ka jingïatreilang, kiei-kiei baroh kin sahkut noh ha shiteng.
Shuh-shuh u Bah Prestone u la pynpaw ba u thrang ban pynkylla ïa ka shnong Nongshkenkum ka ‘Model Village’, hynrei ban urlong kane, ka long kaba donkam ban ïatreilang namar ba u la pynpaw ba ki dang don shibun ki kam ba dang sah.
Katba, ka Kong Grace Mary Kharpuri haba kren kum ka symbud kongsan ka la pynpaw ba nangne shakhmat ka shnong Nongshken kan dang ïai ïoh ïa shibun ki jingkyrkhu.
Halor ka jingïoh ïa ka ïing dorbar, ka Kong Grace ka la pynpaw ba kane ka shnong ka dei ban don ïa ka mynsiem jong ka jingsngewnguh bad bynrap ruh ba ma ka kum ka MDC bad u Bah Prestone kum u MLA ka thaiñ kin ïa bteng ban ai ka kti kamon ka kti kadiang hapoh ka shnong ka thaw.
