Shillong, Naitung 27
U MLA barim ka Mawlai, Bah Process T Sawkmie u ong ba ka jingmynjur jong ka Sorkar Jylla halor ka Ktien Khasi, ktien Garo bad ka Inner Line Permit (ILP) ha ki snem kiba la dep hapoh ïing dorbar thawaiñ ka paw ïa ka jingkitkhlieh kaba ka Sorkar ka don halor kine ar tylli ki mat kiba donkam jong ka jylla bad ka jaidbynriew baroh kawei.
U Bah Process u la pynpaw ba ka Khasi Author Society kum ka seng ka la trei shitom haduh katta-katta ban pynbiang ïa ki jingdonkam baroh ba ka Ministry ka donkam shuh-shuh bad ka Sorkar ka la shimkhia ban ïakynduh ïa ki Myntri ka Sorkar Pdeng hapoh Delhi, nalor nangta ki sengbhalang ruh ki la ai ïa ka jingkyrshan pura.
U ong ruh, “Kumjuh halor ka ILP, ka Sorkar ka la pyrshang shitom, ki sengbhalang baroh ha ka jylla ki la kyrshan tyngeh, wat ki dkhot ba mihkhmat hapoh ka ïingdorbar Parliament ki barim, kiba thymmai ki la kren hapoh Parliament.
“Kine ki mat baroh ar tylli ki shong ha u Myntri Rangbahduh ka ri u Narendra Modi bad u Amit Shah, Myntri ka tnat Kam Pohïing ka Sorkar India ba kin ai noh ïa ka jingmynjur, namar ki la kular mynshwa,” bynrap u Bah Process bad u la pynkut da kaba ong, “Ngi don ka jingkyrmen ba ka Sorkar India hapoh ka jingïalam u Modi kan mynjur noh ïa kine ki mat kiba la kham slem.”
