Shillong, Naitung 27
Ka ophis jong u Principal Accountant General (A&E), Meghalaya, ka la pynlong ïa ka workshop kaba shisngi halor ban pynbeit ryntih ïa ka rukom ai No Demand Certificates (NDC) halor ki ram na ka bynta ki ophisar jong ki nongtrei Sorkar Jylla. Ïa kane ka ‘workshop’ la pynlong ha ka Sngi Thohdieng ha Conference Hall jong ka PAG ha nongbah Shillong.
Kane ka ‘workshop’ ka la pynleit jingmut ha kaba pynduna ïa ka por ba donkam ban ai ïa ki NDC na ka bynta ki nongtrei kiba dang trei bad kiba la shongthait – ka bynta kaba kongsan ha kaba pyntreikam ha ka por kaba biang ïa ki jingmyntoi bai bam tymmen.
Ka jingpynslem ha ka jingai jingmynjur ïa ka NDC bunsien ka khanglad ïa ka jingsiew bai bam tymmen, bad kane ka sienjam ka thmu ban weng ïa kum kine ki jingeh lyngba ka jingïatreilang kaba kham bha bad ki jingpynkylla ïa ka rukom treikam.
Ha kane ka jingïalang la sakhi ïa ka jingïashim bynta naduh ki ophisar jong ka ophis PAG, ka tnat kam pla tyngka jong ka jylla, bad ki Drawing and Disbursing Officer (DDO) na ka tnat ka rep ka riang. Ki jingïalang ïamir jingmut ki la ïarap ban ïoh ïa ki jingtip kiba seisoh – ka jingïasam halor ki jingeh kiba don bad ki rukom treikam ban pynbha shuh-shuh ïa ka rukom treikam jong ka NDC ha baroh ki tnat.
Haba plie ïa kane ka ‘workshop’ na ka bynta u Principal Accountant General, u Deputy Accountant General (AE&VLC) u la pynpaw ïa ka bynta ba kongsan jong ki NDC ha ka jingpynbeit ïa ki bai bam tymmen bad kyntu ruh ïa baroh ki tnat ba kin pyntreikam ïa ki rukom treikam kiba bha tam kiba la ïasam lang ha ki jingïamir jingmut.
La khmih lynti ba kane ka sienjam kan ïarap shibun ban ai jingmynjur kham kloi ïa ki NDC, ban siew ïa ka bai bam tymmen ha ka por kaba biang, bad ban pynkhlaiñ ïa ki rukom pynïaid pisa ha ka Sorkar Jylla Meghalaya.
