New Delhi, Naitung:
Ka tnat Embassy jong ka India hapoh Cambodia, ka la pynmih ia ka jingpynbna ba la maham ia ki paidbah nongleit-nongwan na India kiba don ha Cambodia kin kiar na ki jingleit sha ki bynta khappud jong ka Cambodia bad Thailand hadien ba la iohi ia ka jingiakynad hapdeng ka Cambodia bad ka Thailand la kumba katto- katne sngi mynta.
Ha katei ka jingpynbna paidbah, katei ka tnat Embassy jong ka India ha ka Sngi Saitjaiñ ka la ong namar ki kynrum-kynram bad ka jingiakynad hapdeng ka Cambodia bad ka Thailad ha khappud, la kyrpad ia baroh ki paidbah nong India ba kin kiar na baroh ki jingleit bad ki kam-ki jam sha kitei ki ri bad khamtam eh sha ki bynta khappud jong kitei ki ri.
Kumjuh, ka tnat Embassy jong ka India kaba don hapoh Thailand, ha ka Sngi Thohdieng ka la maham ia ki paidbah nong India kiba don ha Thailand ban kiar shipor na ki kam ba ki hap ban ïaid lyngba ia ki bynta khappud jong kitei ki arliang ri namar ka jingiakynad kaba la jur bad ba la iai bteng hapdeng kitei ki ar tylli ki ri.
