Islamabad, Naitung:
Ka Pakistan bad ka Bangladesh ha kane ka sien la ong ba ki la lah ban poi sha ka jingiakut ban ailad ia ki briew kiba don ia ki passport kiba kham heh kyrdan ban rung khlem da donkam ia ka Visa kumba long lem ia ki riew paidbah, ha kaba ka India ka la peitngor bha ia kane ka rai jong kitei ki arliang mamla. Kane ka rai ka pyni ia ka jingseisoh kaba kham bha hapdeng ka jingiadei jong kitei ki arliang ri, namar baroh arliang mamla ki wad lad ban ioh ban tei biang ia ka jingiadei kaba la tlor noh naduh ka thma laitluid jong ka Bangladesh ha u snem 1971.
Ia kane ka rai ban ailad ia ki heh nong-ialam ban rung khlem Visa la pynbna ha ka Sngi Balang hadien ka jingialang ba heh hapdeng u Myntri kam poh iing ka Pakistan- u Mohsin Naqvi bad u Myntri poh iing ka Bangladesh – u Lieutenant General (ba la shongthait) u Jahangir Alam Chowdhury, ha Dhaka.
Ha kane ka jing-iakynduh, kitei ki arliang mamla ki la mynjur ruh ban pynkhlaiñ ia ka jingiatreilang ha ki bynta jong ka jingpahara hapoh ka ri bad ka jinghikai ia ki bor pahara bad ki shipai ïada ri. U Chowdhury bad u Naqvi ki la iakren ruh halor kumno ban thaw lad ban nang pynjur ia ka jingiatreilang ha kaba iadei bad ka jing-ialeh pyrshah ia u drok bad ka jingkhaii briew kaba long be-aiñ haduh katta-katta bad la ioh ruh ban ïasam jingmut halor ki lad jingïakhun pyrshah ïa ki kam lehnoh bad ki prokram ïasam jingmut hapdeng ki jaka pule pulit jong kitei ki ar tylli ki ri.
Na ka liang jong u Chowdhury, u la ong ba katei ka jingleit jong u sha Bangladesh, ka long kaba kongsan haduh katta-katta ban kyntiew ïa ka jingïatreilang hapdeng ka Bangladesh bad ka Pakistan. U la ai khublei ruh ia u Naqvi uba la pynjlan ia ka jingtyrwa ban ai jinghikai ia ki pulit sha ki heh sorkar na Bangladesh.
