Shillong, Naitung 27
Haduh 30 ngut ki rangïalehkai kiba la don hapoh ka thup na ka bynta ban mihkhmat ïa ka kynhun ïalehkai Under-23 ka Jylla ha ka samoi ïalehkai jong ka BCCI jong u snem 2025-26, ka ban sdang na ka Col CK Nayudu Trophy naduh u Risaw mynta u snem.
Ka jingjied ka Meghalaya Cricket Association (MCA) ïa ka thup ki nongïalehkai ka long kat kum ka jinglah ban ïalehkai bha ha ka jingïalehkai ‘selection trial’ kaba la long dangshen bad ruh halor ka jinglah ïalehkai jong ki ha ka aïom ïalehkai 2024-25 bad 2023-24.
Ka MCA kan pynlong ïa ki jingjied kaba khatduh (final selection-cum-preparatory camps) ha kaba sdang jong u Nailur bad la ai jingmut ïa ki nongïalehkai kiba la don ha ka thup (shortlist) ba kin ïai bteng ïa la ka jingkilanmet, la pynbna kat kum ka kyrwoh ba la pyllait da u Secretary ka MCA, u Bah Rayonald Kharkamni.
Ka samoi ïalehkai kriket jong ki shynrang U-23 kan sdang da lympung ïalehkai Col CK Nayudu Trophy kaba bun sngi naduh ka 16 tarik u Risaw, bud sa ka one day U-23 Men’s State A Trophy naduh ka 9 tarik u Naiwieng.
Ki kyrteng jong 30 ngut rangïalehkai kiba la don hapoh ka thup ki long u Gavineal J Marpna, PM Santosh, Kevin S Christopher, Purav Agarwal, Rohit Yadav, Gulgul Sangma, Manish Sharma, Asif Khan, Navin Kumar Ray, Salchang Sangma, Appante Waldora A Sangma, Denikcheng Marak, Chandra B Thapa, Banïalam Mylliemngap, Pushkar Raj Singh, Josiah Momin, Raghav Magotra, Sachin Kumar, Avinash Rai, Kshitij Singhania, Charm Marbaniang, Rituraj Rabha, Dipankar Baruah, Sudhir Sahani, Manthan Dey, Shavian P Blah, Ayushman Das, Thunun Marak, Superson Lyngdoh bad u Dairo Marak.
