Shillong, Naitung 27
Ka Dr. APJ Abdul Kalam Foundation of Meghalaya ka la rakhe ïa ka sngi kynmaw burom ba 10 ïa u nongshna ‘namding, Dr. APJ Abdul Kalam, da kaba pynlong ïa ka seminar bad ka jingpynkup burom ha U Soso Tham Auditorium ha Shillong ha ka Sngi U Blei.
U Commissioner and Secretary, Dr. BDR Tiwari u la shim ïa ka bynta kum u kongsan ïa kaba la synran lang da u Munish Singh, Director of Art and Culture, NE Zone kum u symbud kongsan.
Ha kane ka jingïalang la plie lyngba ki jingrwai pdiang sngewbha da ki dkhot ka Dr. APJ Abdul Kalam Foundation bud pat sa ka tbeh sharak bad ka jingkren pdiang sngewbha na u Falguni Chakraborty, uba dei u State President bad ka jingrwai ieit ri.
Ha kane ka sngi la pyllait paidbah ruh ïa ka kot ba la ai kyrteng “My Encounter with the Missile Man of India” ba la thoh da u Dr. AM Kharbamon.
Ïa ka khusnam Dr. APJ Abdul Kalam Awards la ai sha ka Padmashree Kong Silbi Passah, u Dr. Adorable Kharbamon, ka Kalpana Roy bad ka Manisha Sharma.
Ka scholarship kaba ar hajar la sam sha ki khynnah ba pass bha, ryngkat ki khusnam sha ki nongjop ha ki jingïakop Art, Model, Craft, Quiz, bad Essay kiba la pynlong ha u bnai ba la dep.
Ki nongthoh kot ne ki myllung na Shillong kiba la ïa shim bynta ha kane ka poet’s meet, ki la ai burom ïa ka jingnoh synñiang jong u Dr. Kalam.
