Imphal, Naitung:
U Lat ka jylla Manipur, u Ajay Kumar Bhalla, ha ka sngi Saitjaiñ, u la pynpaw ba suki suki ka jingsuk bad ka jinglong jingman ka wanphai biang ha ka jylla, namar ka jingtreilang jong ka sorkar, ki bor pahara, bad ki seng bhalang.
Haba kren ha ka jingïalang ha Imphal kaba rakhe ïa ka jingdap 26 snem jong ka Kargil Vijay Diwas, u Lat ka jylla u Bhalla u la kubur ïa ka jingktah jong ka jingïakynad jaitbynriew kaba dang ïai bteng ha kane ka jylla.
“Bun ki mynsiem ki la duh, bad da ki hajar ngut ki la phetwir namar ka jingshah thombor.Hynrei ka sorkar ka la shim katto katne ki sienjam ban weng ïa ka jingeh bad ban pynïoh biang ïa ka jingshaniah jong ki paidbah”, u la ong.
U Lat u la pynpaw ba ki jingtreilang ba la pynlong da ki pulit jylla bad ki shipai ka sorkar pdeng ki la pynlong ban lap ïa ka jaka buh tiar siat bad ki kuli ba la buhrieh bha ha kine ki bnai ba la dep.
U la kdew ruh ba ki tnad pahara ki la kem ïa ki katto katne ki lehnoh kiba donkti ha ki kam dawa pisa, kynthup ïa kito kiba pyndonkam ïa ki Cyber platform ban bei tyngka ïa ki kynhun lehnoh.
Ban ïakhun pyrshah ïa kum kine ki kam, ki pulit ka jylla Manipur ki la plie paidbah ïa ka ‘Anti-Extortion Cell’ bad ka Confidential Helpline ryngkat ka jingïatreilang bad ka Central Armed Police Forces (CAPFs), Assam Rifles, bad ki Army.
Kine ki jingthmu ki thmu ban ïada ïa ki nongshong shnong na ki jingdawa beaiñ bad ban pynbeit ïa ki rukom ujor.
U Bhalla u la pyntip ruh ba la buh bun tylli ki jaka ba la leit khynra ha kylleng ki distrik kiba don ha ki jaka lum bad them, khamtam ha ki surok bah, ban pynthikna ïa ka jingpoi khlem jingthut jong ki jingdonkam ba kongsan kum ki marbam bad ki dawai.
“Kine ki jingpyrshang ba ïatylli, ryngkat bad ka jingïatreilang bad ki paidbah, ki pyntlot ïa ki kynhun lehnoh, ki pynduna ïa ki jingjia dawa pisa, bad ki trei ban pynphai biang ïa ka shongsuk shongsaiñ,” u la bynrap.
Ka jingpyntreikam ka dang ïaid shakhmat ruh ban ïarap ïa ki briew kiba la shah pynkynriah shnong.
“Ngi pynleit jingmut ha kaba pynphai biang ïa ka jingkyrmen bad tei ïa ki sap hapdeng ki paidbah ba la shah pynkynriah jaka.Ka jingïakren bad ki seng bhalang kiba mihkhmat ïa ki jaitbynriew Meitei, Kuki-Zo, bad Naga ka dang ïaid shakhmat ban pynsuk ïa ka jingpynkynriah jaka mon sngewbha bad ban pynthikna ïa ki jingpynbeit jingïada kiba kynthup lang ïa baroh,” ong u Lat.
Ka jylla Manipur, ka la don hapoh ka jingsynshar President’s Rule, naduh ka 13 tarik, Rymphang, 2025, hadien ka jingiehnohkam jong u Myntri Rangbah ka jylla, u N Biren Singh bad ka jingshah pynsangeh treikam shipor jong ka State Assembly.
Kumba la sakhi, la ong ba ka jylla ka la ïohmad jingeh na ki jingshah thombor jong ki jaitbynriew naduh u bnai Jymmang, 2023, kaba la ktah nyngkong eh ïa ki jaitbynriew Meitei ha ka them Imphal bad ki jaitbynriew Kuki ha ki jaka lum. Ka jingkulmar ka la shim ïa ka jingim jong 260 ngut ki briew bad pynduh jaka sah ïa ki hajar ngut.
