Islamabad, Naitung:
Uwei u nongialam ka liang pyrshah jong ka Pakistan, u don napdeng palat lai phew ngut ki dkhot bad ki nongkyrshan jong ka seng jong u Myntri Rangbahduh barim katei ka ri, u Imran Khan, kiba la shah rai set patok shi snem ha ka taiew ba la dep.
Ïa kine ki jingpynshitom la rai da ki ïingbishar kiba ieng ban ialeh pyrshah ia ki kam thombor jong ki lehnoh ba Shatei Lam Mihngi, kynthup ia ka nongbah Lahore bad ka nongbah Sargodha hadien ba la lap da ki phew ngut ki la don kti ha ki jingkulmar pyrshah sorkar ha ka por ba la kem nyngkong ïa u Khan.
“U nongialam liang pyrshah jong ka Punjab Assembly, U Malik Ahmad Bhachar, u la shah rai set patok haduh shi snem kynthih namar kitei ki kam be-aiñ kiba u la don kti ban ialeh pyrshah ia ka sorkar ha ki por ba la leit.
U Bhachar u dei u nongialam jong ka liang pyrshah ha Punjab, kaba dei ka Jylla kaba bun briew tam bad kaba donbor tam ha ka saiñ pyrthei jong ka Pakistan.
Hadien katei ka rai ha ka Sngi Ba-ar, u la kular hapoh ki rynsan social media ba un ym kynran dien ne sangeh da lei-lei ruh ban ai jingkyrshan ïa u Khan.
U nongaiktien jong ka Pakistan Tehreek-e-Insaf (PTI) jong u Khan, u la iathuh ha ki nongthoh khubor ba ym shym la kem ia u Bhachar haduh ka janmiet jong ka Sngi Ba-ar.
Nalor u Bhachar, ka ïingbishar ha Sargodha ka la rai pynrem ruh sa ïa uwei pat u nongthaw aiñ ba dang don ha ka kam, kumjuh ia uwei u nongïalam barim bad 32 ngut kiwei pat ki nongkyrshan jong ka seng PTI, da kaba rai ban set patok kum ka jingpynshitom haduh 10 snem uwei u briew, namar ka jingthombor ïa ki ïing sorkar.
Lah ban kdew ba kyrpang, ka ïingbishar ha Lahore, ka la rai pynrem ïa ki 8 ngut ki dkhot ka PTI, da kaba set phatok 10 snem marwei marwei, namar ka jingdonkti jong ki ha ki jingkulmar ha katei ka nongbah.
Kiba shah rai pynrem ki kynthup ïa u Lat barim jong ka Jylla Punjab, U Omar Sarfraz Cheema, myntri barim ka Jylla, u Yasmin Rashid, bad U Ejaz Ahmed Chaudhary, uba dei u Sitting Senator.
Hynrei u myntri barim ka kam bar ri u Shah Mahmood Qureshi u la pyllait noh ryngkat bad phra ngut kiwei pat.
U Khan, uba don ha ka kam naduh u snem 2018 haduh u snem 2022, u la shah kem nyngkong ha u bnai Jymmang jong u snem 2023, kaba la wanrah ïa ki jingkulmar ha baroh kawei ka ri hadien ba la kem noh ia u, ha kaba katto katne na ki, ki dei kiba la leit thombor bad leit tur ruh shaduh ki jaka treikam jong ki shipai ka ri.
Ia kane ka jingpynshitom ha ka Sngi Ba-ar la rai halor ka jingshah thombor jong ki pulit bad ki riew paidbah ha ki konstitwensi jong u Khan ha ka nongbah Mianwali bad Lahore. Kito kiba shah kynnoh ba ki thmu ia ki ktem shipai kin hap hapoh ka jingbishar ba kyrpang ha ki ïingbishar shipai.
Hynrei na ka liang ka seng PTI, ka la pynksan ban tuklar ia ki rai jongka ha ki ïingbishar kiba kham heh bad ba kham don bor.
U la pynrem ruh ia kitei ki ïingbishar kiba la ai jingkyrshan ia ka sorkar bad u long ba kine ki ïingbishar ki long ki nonglehkai ia ka saiñ hima-sima hapoh ka ri.
U Khan u la shah set patok naduh u bnai Nailar jong u snem 2023 halor ki jingshah kynnoh bamsap kiba ka seng jong u ka ong ba ki dei kiba don kti ha ka saiñ pyrthei.
