Mawkyrwat, Naitung 27
Ka SWKHD Cricket Association ka pynpaw ka jingsngewkhia kaba jur halor ka jingkynnoh bym don nongrim jong uwei u rangïalehkai kriket na South West Khasi Hills pyrshah ïa ka Meghalaya Cricket Association (MCA) hadien ba um shym la shah jied ban mihkhmat ïa ka Jylla na ka bynta ki lympung ïalehkai ka BCCI jong ka aïom ïalehkai 2025-26.
Utei u rangïalehkai u la kynnoh pyrshah ïa ka MCA ba ka leh politik da kaba ka la ailad ïa ki rangïalehkai nabar jylla bad kiba bun na ki Khasi ki la shah pynduh ïa kane ka lad ban mih-khmat ïa ka Jylla ha ki lympung ïalehkai jong kane ka aïom watla ki la lah ban pynpaw ïa la ki jingtbit.
Haba pynpaw ha ki lad pathai khubor ha ka Sngi Thohdieng, u Divension Lyngdoh u la kynnoh ruh ba ka don ka jingbamsap kaba jur hapoh ka MCA da kaba pynrung rangïalehkai da ki bar jylla bad shim pisa haduh T. 5 lak ne T. 6 lak tyngka katba ka don pat ka jing-leh shiliang khmat ïa ki rangïalehkai trai jylla.
Ha kaba ïadei bad kane na ka liang ka SWKHD Cricket Associa-tion ha ka sngi Saitjaiñ ka la shong ïa ka jingïalang ba kyrkieh hapoh Mawkyrwat bad ïoh ban pynshai ruh ha kaba ïadei halor katei ka kam.
U Bah Banteibor Lyngdoh, President bad Bah Bakhain Nongsiej, Secretary haba kren sha ki lad pathai khubor ki la ïathuh ba ïa u Dibension Lyngdoh bad lai ngut kiwei pat, ka synjuk ka la phah ban mihkhmat sha ka jingpyrshang ne ka trial ba la pynlong da ka MCA ha Jagiroad Assam naduh ka 8 haduh ka 10 tarik u Jylliew 2025. Katkum ka jingpeit bniah lyngba katei ka ‘trial’ utei u rangïalehkai um shym la lah ban ïalehkai bha bad kumta u khlem shah jied ha ka thup ban mihkhmat ïa ka Jylla.
Halor katei ka jingkren jong u ha ki lad pathai khubor, na ka liang ka synjuk ka la pynpaw ba kam don kano-kano ka jingtip, hynrei ka dei ka jingleh hi jong u shimet bad lehse ka dei na ka daw ba um shym shah jied, la ong ki nongïalam ktei ka synjuk.
Ka SWKHD Cricket Association ka la panmap ruh na ka Meghalaya Cricket Association ba ka la kum phah ïa utei rangïalehkai sha ka ‘trail’ kaba wanrah pynban ïa ka jinglehraiñ ïa ka synjuk, ïa ka district baroh kawei bad kaba la ktah matïong ruh ïa ka MCA .
Te, kumta na ka liang katei ka synjuk ka la rai ruh ba kam don kano-kano ka jingkitkhieh ïa utei u rangïalehkai lada ka MCA ka shim da kano-kano ka lynti ha kaba ïadei bad katei ka jingleh jong u.
Katkum ka jingpynbna jong ka MCA ha ka 24 tarik ïa ki kyrteng ki rangïalehkai (senior) ban mihkhmat ïa ka Jylla naduh ka Ranji Trophy, T20 Syed Mushtaq Ali Trophy bad ka Vijay Hazare Trophy, ki kynthup ïa u Anish Charak, Bijon Dey, Adarsh Joshi (standby Bipin Kumar Ray), Agreas Chamcham A Sangma, Arpit Bhate-wara, Bibek Poudel, Kishan Lyngdoh, Swara-jeet Das, Akash K Chau-dhary, Himan C Phukan, Swastic Chettri, Yogesh Tiwari, Jaskirat Singh Sach -deva, Chengkam Sang-ma, Ram Gurung, Arien B Sangma, Mewada Shylla, Arbin Singh, Badonnam John Mylliemngap, Kush Agarwal, Abhishek Gup-ta, Aaron AR Nongrum, Rohit Shah, Abhishek Kumar, Aryan Borah, Tarique A Siddique, Bamanbha Shangpliang, Riboklang Hynniewta, Dippu Sangma, Lerry G Sangma, Rahul Shah bad u Sengsrang K. Sangma.
