U Sohadong ngi sngewthuh u long ka dak jong ka jingsniew ba u Blei naduh hyndai u la khang ïa ngi ki briew ban bam ïa une u sohadong ba u la buh bad thung kyrpang hapoh kata ka kper Eden. Hynrei ngi ki briew naduh ki por mynbarim bajah naduh mynta ruh ngi saitlah bad ngim kohnguh ïa ki hukum u Blei. Ngi ïai leh ïa ki kam ba sniew bad ngi ïai bam ïa ki jingbam kiba sniew haduh mynta. Haba phai mynta ki por lei lei bun na ngi ngi ïa beh brai ïa kiei kiei ki bym dei ban leh.
Ngi la tip ba ka kiad ka long kaba sniew hynrei ngi dih khnang ïa ka. Ngi tip ba u drok u long uba sniew hynrei ngi dang ngop ha une u jingdih ba sniew ba pynbuaid bad pynjot ïa ka jingim briew. Ngi tip ba ka bamsap ka long kaba sniew hynrei ngi dang ïai leh bad kwah ban ïoh shibun nalor ka um syep ba ngi kamai. Ka bamsap ka long ka jingleh thok leh shukor ban pynïoh spah bad pynmyntoi lyngba ka lynti ka bym dei. Naduh mynhyndai haduh kine ki sngi ruh ki briew ki da kwah eh ban ïoh shibun ka jingmyntoi khlem da trei shitom. Dei kane kaba la pynlong ïa ngi ki briew ban kyntait ïa ki kam babha bad ngim kohnguh ïa ka jingsneng jingkraw jong ki kpa tymmen ki la pruid dak ïa ngi ba dei ban kamai ïa ka hok khlem ka jingleh shukor ka jingleh thok. Hynrei ngi dang ïai ïaleh ban thok ban shukor para briew. Kane keiñ ka dei ka jingsniew kaba la satah ha ka jingïaid lynti jong ngi ki briew ha kane ka pyrthei. Kum ki briew ngim lah shuh ban kiar na kaba sniew watla haba la don ka adong ban ym leh ïa kaei kaei ka bym dei ruh. Ngi ïai leh ban pynkheiñ ïa ki adong jong u Blei ruh. Te ïa ki adong briew ym don ba ngeit bad kohnguh.
C. B. Iawphniaw
