Shillong, Naitung 28
Ka Pomlakrai SC ka la pynliem noh ïa ka Lawmali SC da 2-0 kol na ka bynta ban ïoh ïa ka jingjop kaba nyngkong ha ka Group-A jong ka lympung ïalehkai SRGT 3rd Division Football League 2025 ba la pynïaid da ka Shillong Sports Association ha ka Lah Sngi U Blei.
Ha kane ka jingïakhun kaba la long ha SSA Stadium kaba ha First Ground Polo, baroh ar kynhun ki la pyrshang ban ïakhun tyngeh naduh kaba sdang. Ka Pomlakrai SC ka la ïoh ban pynkhih jar nyngkong ha ka minit kaba 25 lyngba u Nathanel Marbaniang. Kane ka kynhun ka la pynbud biang ïa ka kol ba ar shwa ban kut ka jingïalehkai jong ka kylla step lyngba u Macdonald Kukalang (45+2) na ka bynta ban tam ar kol ïa ka liang pyrshah.
Hadien ba la bteng ïa ka jingïakhun jong ka kylla miet baroh ar kynhun ki la ïai bteng ban ïakhun tyngeh, hynrei kim shym la lah ban thep kol haduh kaba kut ka jingïalehkai bad ka Pomlakrai ka la khur ïa ki lai point.
Lyngba kane ka jingjop, ka Pomlakrai ka la jam sha kliar duh na katei ka group watla ka ïaryngkat mar 5 point bad ka Lawmali.
Haba phai sha kawei pat ka jingïakhun jong ka Group-B hapdeng ka Lumparing SC bad ka Umlyngka SC ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Kane ka lympung kan bteng biang ha ka Sngi Ba-ar ha kaba ka Nongumlong SC kan ïakhun pyrshah ïa ka Sanmer SC ha ka por 1 baje mynsngi.
