Istanbul, Naitung:
Ki jingpluh khlaw kaba la bam duh ia ka Turkey la bun taïew mynta, ka la buh jingma ia ka nongbah kaba saw bad heh jong katei ka ri bad kaba la pynlong ia palat 1,500 ngut ki briew ba kin hap ban phet krad na la ki iing ki sem bad kaba la shim ruh ia ka jingim jong uwei u nongpynlip ding ha ka step jong ka Sngi U Blei.
La ong ba ka ding kaba klang baroh shi miet ha ki bynta lum bad khlaw kylleng sawdong jong ka Bursa ha ka thaiñ Shatei Lam Mihngi jong ka Turkey bad ka la pur stet bha bad kaba la lah ruh ban iohi ia ka jingjur ka ding kaba la thaba na ki jaka ba sha ka phang Mihngi jong katei ka nongbah ha ka por mymiet. Da ki phew tylli ki jingpluh khlaw kiba jur bha ki la jia ha katei ka ri manla ka sngi naduh kaba kut jong u bnai Jylliew, ha kaba ka sorkar ka la pynbna ia ki ar tylli ki nongbah ba Shathie, ka Izmir bad ka Bilecik, kum ki jaka ba la shah ktah jur ha katei ka jingpluh khlaw ha ka Sngi Thohdieng.
Ka ophis jong u Lat ka Bursa ka la ong ha ka jingpynbna ha ka Sngi U Blei ba 1,765 ngut ki briew ki la shah pynkynriah suk na ki shnong kiba don ha ka thain shatei lam mihngi katba palat 1,100 ngut ki nongpynlip ding ki dang ialeh pyrshah ia ka ding. Ka surok bah kaba pynïasoh ïa ka Bursa bad ka nongbah Ankara, ka la shah khang, namar ba ki khlaw ba marjan, ki la shah thang.
Ha katei ka sngi , la ong ba uwei u dkhot jong ka kynhun pynlip ding u la duh noh ia la ka jingim namar ka jingpang kyndit katba u dang don lang ha katei ka jaka ban ïakhun ia katei ka ding kaba klang jur ha ryngkat bad ki kynhun jong u.
U heh jong katei ka nongbah, u Mustafa Bozbey u la pyntip ruh ba ki thylliej ding ki la ioh ban bam duh ia palat 3,000 hectare (7,413 acre) ka jaka ha kylleng jong ka nongbah.
U Orhan Saribal, nongmihkhmat jong ka liang pyrshah na ka bynta katei ka jylla, u la ong ba kine ki jingjia ka dei ka jingkut jong ka pyrthei bad ki long ki jingjia jong ka jingpynjot ha kine ki sngi ba khatduh.
Tad haduh ka step Sngi Nyngkong, la ong baynda ka lyer ka la kham jai-jai, ki kynhun pynlip ding ki la kham ioh lad ban tehlakam ia katei ka ding kaba klang ha katei ka khlawbah. Hynrei watla katta la ong ba ki dang bun ki bynta kiba ka ding ka dang klang bad iai bteng hi ban pur sa sha kiwei pat ki bynta jong katei ka ri.
U Myntri ka tnat khlaw, u Ibrahim Yumakli, u la ong ba ki nongpynlip ding ha kylleng ka ri ki la leit sha ki 76 tylli ki jaka pluh ding ha kylleng jong katei ka ri ha ka Sngi Saitjaiñ. Ia mynta hi, la ong ba ka thaiñ ba Shatei Lam Mihngi jong ka ri, ka don ha ka jingma kaba khraw tam, kynthup ia ka Karabuk, ha kaba ka jingpluh khlaw ka la sdang naduh ka Sngi Ba-ar jong ka taïew ba la lah.
Ka jingshit kyrang jong ka sngi ha kane ka aïom Lyiur, la ong ba ka la wanrah ia kum kine ki jingjia pluh khlaw ha kiba bun ki ri jong ka pyrthei na ka por sha ka por.
Ka General Directorate of Meteorology, ka iathuh ba ka Turkey, ka la ioh mad ia ka jingshit kaba jur tam haduh mynta, kaba long 50.5 degree Celsius (122.9 degree Fahrenheit) khamtam ha ki katto- katne ki bynta jong ka ri kiba kynthup ia ka nongbah Sirnak, kaba don sha ka phang Shatei Lam Mihngi.
