Shillong, Naitung 28
Ka Hynñiewtrep National Youth Front (HNYF) Mawryngkneng Circle ha ka Lah Sngi U Blei ka 28 tarik u Naitung 2025, ka la leit ban ujor sha u Myntri ka tnat Excise, Bah Kyrmen Shylla halor ka jingai No Objection Certificate (NOC) ka Dorbar Shnong Pommura ban plie dukan kyiad.
Ha ka jingïakren bad ki lad pathai khubor, u Working President HNYF Mawryngkneng Circle, Bah Robert Sohtun u la ïathuh ba kane ka jingpyrshah jong ka seng ban ai NOC plie dukan kyiad ka dei namar ba ka thaiñ ka la don lypa ki dukan kyiad.
U Bah Robert u la ong ruh, ba ka thaiñ Pommura kaba don marjan bad ka shnong Mawryngkneng ka la don lypa ki dukan kyiad bad kumjuh ruh ki don bun tylli ki dukan kiba die kyiad beaiñ.
Shuh-shuh, u la pynpaw ba ka seng hi ka pyrshah halor ka jingai jingbit jong ka Dorbar Shnong Pommura ban buh dukan kyiad biang sa kumba saw ne san tylli eiei.
Kumta, u la ong ba na ka liang ka seng ka phai khmat sha u Myntri ba un shim ïa ka sienjam ban pynsangeh noh mardor ban ai ki ‘licence’ ban buh dukan.
U Bah Robert u la kynnoh ruh, ba ka jingdon ki dukan kyiad bad ka jingdie kyiad beaiñ ka la wanrah ki jingjia kiba sngewsih bad ki bym sngewtynnad kum ka jingduh ïa ki mynsiem briew bad ki jingjia tyngkhuh kali bapher-bapher, ka ïashoh-ïadat bad ka wanrah ruh ka jingktah ïa ki shnong marjan kumjuh.
Haba kylli, u Bah Robert u la ïathuh, ba na ka liang u Myntri u la kular ban bishar bniah bha shwa ïa kane ka kam.
