Shillong, Naitung 28
Ka Hynñiewtrep Integrated Territorial Organisation (HITO) Sengkmie ha ryngkat ki dkhot bad ki nongïalam jong ka HITO Ribhoi District, ha ka 28 tarik Naitung, 2025, ki la leit ban ïakynduh bad ban aiti da ka dorkhas ïa u Chancellor ka skulbah University of Science & Technology Meghalaya (USTM), kaba don ha 9 Mer, Ri Bhoi, u Mahbubul Hoque ban pynpaw ïa ka jingpyrshah kaba jur halor ka jingthmu jong une u khliehduh ka skulbah ban ai jinghikai bad pynrung skul ïa ki khynnah rit kiba dei na ki longïing-longsem jong kito ki nongwan buhai shnong be-aiñ bad kiba dang shu dep shah kyndang dang shen napoh ka Jylla Assam.
Haba kren sha katto-katne ngut ki lad pathai khubor, u President ka seng, Bah Donbok Dkhar, u la pynpaw ka jingsngewkhia kaba jur halor kane ka jingthmu u Chancellor katei ka skulbah da kaba pynpaw ba kane ka jingthmu kan wanrah ka jingktah kaba jur namar kine ki briew kim dei ki nongshong shnong jong ka Meghalaya ne ki nongshong shnong jong ka Ri India ruh.
U Bah Donbok u la thalaiñ tyngeh da kaba ong ba ki mat dei ki khun jongno-jongno hynrei ki briew ki bym dei hi ki nong India, ka seng ka pyrshah jur halor kane ka jingthmu jong une u khlieh ka USTM bad ong ba ka seng kan ym shah ïano-ïano ba kin wan buhai shnong ne ban ai jaka ïa kino-kino ki briew kiba shah beh na ka Sorkar Assam ne na kiwei-kiwei ki Jylla ban wan buhai shnong hapoh ka Jylla Meghalaya.
“Hapoh Jylla jong ngi, ngin ym shah da lei-lei ruh ïa ki nongwei khamtam ba kim dei ruh ki nong India ba kin wan pule ne ban ïoh jingïarap napoh ka Jylla jong ngi”, ong u Bah Dkhar.
U la ong ba kane kan long ka jingma kaba khraw ïa ka Jylla Meghalaya lada ailad ïa ki mynder kiba shah beh napoh ka Jylla Assam ban rung kyrthep shapoh ka Jylla Meghalaya.
“Da kaba pyrkhat ïa ki jingeh ha ka jinglong-jingman mynta, kynthup ïa ka jingkiew ka jingwan rung tuh ha khappud India bad Bangladesh bad ki khubor wad bniah kiba mih halor ki kam ba ïadei bad ka ISI ha Bangladesh, ka long kaba donkam ba ki shlem pule ha ka thaiñ Shatei Lam-mihngi kin long kiba da husiar bha. Ka thaiñ shatei lam-mihngi, bad khamtam eh ka Meghalaya, kam dei ban long kaba jem halor ka jingthmu wan buhai shnong khlem kot khlem sla hapoh ka jingtap jong ka jingïarap ïa ki briew”, ong u Bah Dkhar.
Na ka liang u Vice-Chancellor u la kren da kaba shai ba kaei kaba u la ong ha ki rynsan ‘social media’ ka dei ka jingbatai bakla bad ong ba um pat pynrung satia ïa kino-kino ki briew kiba shah beh na Assam.
Utei u khliehduh ka skulbah u la kular ruh ba lada don kino-kino kiba pyrshah halor kane ka jingthmu jong u, un kynran dien noh na kane ka jingthmu jong u bad ong ba un ym shah kulmar ïano-ïano ban rung hapoh katei ka skulbah khlem da biang ki kot ki sla ne ki jingpynithuh kiba biang ban pynshisha ba ki dei ki nongshong shnong jong ka Ri India.
“Kam dei ka jingpyrshah ïa ka jingpule ne ka jingbha jingmiat jong ki khynnah hynrei ka jingsngewkhia jong ngi ka mih na ka jingpynlong tynrai kaba thmu ïa ka jinglong be-aiñ hapoh ka jingtap jong ka jinglehbha. Kum ka sengbhalang kaba la rung jylliew bha ha ka jingïada ïa ka khyndew ka shyiap, ki briew, bad ka jinglong tynrai jong ka Meghalaya, ngi shim ïa kane ka jingthmu kum kawei kaba don jingma ban pynthut ym tang ïa ka jinglong ba janai jong ngi hynrei wat ïa ki jingïada jong ka riti synshar jong ngi kum ki nongshong shnong jong ka Jaitbynriew ba la buh kyrteng hapoh ka Khyrnit kaba Hynriew”, bynrap u Bah Dkhar.
