Shillong, Naitung 28
Ka Chloe Kelly ka la lah ban pynpaw ïa ka jingtbit na ka bynta ban pynlong ïa ka England ban pynliem noh ïa ka Spain lyngba ka tie-breaker da 3-1 kol na ka bynta ban bat biang ïa ka nam lahduh ha ka UEFA Women’s Euro 2025 ha ka Sngi U Blei ha Basel.
Kane ka jingïakhun final ka la kut noh da ka jingïakhaid mar 1-1 kol wat hadien ba la pynjlan ïa ka por ïalehkai sha ka extra time, hynrei ka England ka la lah ban pynurlong na ka bynta ban wanphai biang hadien ka jingshah rem ha ka jingïakhun phainal jong ka World Cup 2023 ha kajuh ka kynhun.
Watla kane ka jingïakhun ka la long kaba itynnad bad kaba ïakhaid bha ha kaba baroh ar kynhun ki la pyrshang ban ïakhun tyngeh, pynban ka Spain ka la pynkhih jar nyngkong eh lyngba ka Mariona Caldentey ha ka minit kaba 25. Hynrei ka England ka la lah ban pynphai kylla ha ka kylla miet lyngba ka Alessia Russo ha ka minit kaba 57 na ka bynta ban ïakhaid mar shi kol.
Ha ka jingshisha ka Spain ka la lah ban ïalehkai bha lyngba ka jingdon haduh hynñiew ngut ki ‘thei ïalehkai ka Barcelona kiba la mih madan naduh kaba sdang, hynrei kim shym la lah ban pynurlong na ka bynta ban thep kol. Kumjuh, ka England ka la ïoh ïa ki kabu kiba biang, hynrei kam shym la lah ban pynurlong. Ka Beth Mead ka la pynlehnohei ïa ka penalty bad ka kapten ka Leah Williamson ka la shah khanglad noh ha ka ‘thei apkol na Spain ka Cata Coll.
