Nongstoiñ, Naitung 28
Ka jingkyndang naphang jong ka Sorkar Assam ïa ki briew nabar kiba shong beaiñ hapoh ka Assam, ka la pynlong ruh ïa kiba bun balang khamtam ïa ki kynhun sengbhalang jong ka West Khasi Hills ba kin mih shakhmat ban pynpaw ïa ka jingsngewkhia ha kaba ïadei bad kane ka phang.
Ka Hynñiewtrep Youths’ Council (HYC) West Khasi Hills ha ka Lah Sngi U Blei halor kane ka phang ka la leit ban ïakynduh ïa u Deputy Commissioner ka West Khasi Hills ban dawa pynkhlaiñ bad pyrkhing bha ha kaba ïadei bad ka rung ka mih jong ki briew hapoh ka district.
U samla Wanteibok Lyngdoh, General Secretary ka HYC WKH haba kren sha ki lad pathai khubor hadien ka jingïakynduh bad u DC u la ong, ka seng ka pynpaw ïa ka jingsngewkhia bha ha kaba ïadei bad kane ka jingjia ha Assam ïa kaba ka Sorkar Assam mynta ka dang kyndang ïa ki briew nabar kiba shong beaiñ ha katei ka Jylla ha kaba kane khlem pep kan wanrah jingeh ïa ka Jylla kumjuh ïa ka district ba kitei ki briew ki lah ban rung beaiñ hapoh ka district namar ka jingtieng ïa ka Sorkar Assam.
Nalor kane, u la ong ruh ba ka seng lyngba ka jingthoh, ka la ai jingmut ïa ki bor district lyngba u DC ban lum lang ïa baroh ki kynhun seng, ki Syiem, ki Rangbah Shnong, ki VDP khamtam ïa kito kiba don marjan bad ka Jylla lane kiba don khappud bad ka Jylla ban ïa phylliew jingmut ban pynsuk ban khang lad ïa ka rung ka mih hapoh ka district.
Kumjuh, ka la kyntu ban pynkhlaiñ ïa ki infiltration gate kiba peit ïa ka rung ka mih hapoh ka district khamtam ha ka por mynmiet ban peitngor bha.
U samla Wanteibok u la ong ruh ha kaba ïadei bad kitei ki mat ba ka HYC ka la aiti ïa ka jingthoh, na ka liang jong u Deputy Commissioner u la ong ba na ka liang ki bor district ka la shimkhia khamtam ha ki jaka khappud bad u la ong ruh ha kine ki taïew un sa pynlong ki jingïalang ïa kaba un sa khot ïa ki rangbah shnong kum ha ka thaiñ Shahlang bad ka thaiñ Athiabari ha West Khasi Hills.
Shuh-shuh, u samla Wanteibok u la ïathuh ruh ba u DC u la dep ban phah ruh ïa ka jingthoh sha u SP ka West Khasi Hills bad kumjuh sha u SDPO ka Mawshynrut ha kaba ïadei bad kane ka bynta bad kaba sngewtynnad ka long ba u DC ha kaba ïadei bad ki nongtrei bylla ba ki lah ban don kiba wan ban aplai lyngba ka tnat labour ban wan trei kam hapoh ka Jylla bad ka District. Kumta ha kaba ïadei bad kane u la bthah ïa ka tnat ba dei peit ba nangne shakhmat ym dei ban shu ai kulmar hynrei dei ban da pyntikna bha.
