Jowai, Naitung 28
Ka long kaei-kaei kaba sngew thamula namar ki khappud jong ka West Jaiñtia Hills District, Meghalaya bad ka West Karbi Anglong District, Assam ki dang don hapdeng ka jingïakajia hynrei ki Karbi ki la kam ba ki la dep sieh lai tylli ki mawpud bad ki Pnar ki la pynpra ïa kitei mawpud da u bom ha ka miet jong ka 27 tarik Naitung.
Ki Karbi na ka shnong Tahpat kaba don ha West Karbi Anglong District ki la kam ba ki don lai tylli ki mawpud kiba la sieh hapdeng ka shnong Tahpat bad Lapangap jong ka West Jaiñtia Hills District. Katkum ka jingkam jong ki Karbi, uwei u mawpud u don hapdeng wah, uwei pat u mawpud ha pynthor kba bad uwei pat u la shah pynpra ha ki ‘riew runar bym ithuh hynrei la kynnoh pat ba la leh da ki nongshong shnong ka Lapangap.
Ki Karbi ki la kynnoh ba ha ka por 12.15 shiteng synñia jong ka 27 tarik u bnai Naitung, ki la don ki Pnar na Lapangap ba wan bret da ki tiar jingpynbthei ne ki bom ban pynjulor ïa u mawpud ba don ha ka wah.
Haba ïakren bad u waheh shnong ka Lapangap u Ma Deimonmi Lyngdoh u la ong ba katei jingjia ba la kam da ki Karbi ka long tang ka jingkynnoh pyrshah ïa ki nongshong shnong ka Lapangap.
U Ma Deimonmi u la buh ka jingkylli ïa ka Sorkar Meghalaya la ka la don ne em ka jingsieh mawpud hapdeng ka Assam bad Meghalaya naduh ki por kiba mynshwa ne ki por ba la dep, khnang ba ki nongshong shnong ruh kin sngewthuh bad kum ki nongshong shnong kiba shong ba sah ha katei ka thaiñ haduh mynta kim pat ju ïohsngew ba la dep ban sieh mawpud.
Shuh-shuh lada don uta u mawpud mawsam kumba kam ki Karbi kan myntoi aïu ban ïakren pynbeit pud hapdeng ka Meghalaya bad Assam, la ong u Ma Deimonmi bad bynrap ba kum ki nongshong shnong kim pat ju ïohsngew na ka liang ki longshwa manshwa kin ïathuh khana ba kine dei ki mawpud ba la dep sieh hapdeng ki ar jylla. Kane ka jingkynnoh kaba khlem nongrim jong ki Karbi ka dei tang ka jingpynthohbria ïa ki nongshong shnong ka Lapangap, la ong u Waheh Shnong.
Ha kaba ïadei bad ka jingkynnoh jong ki Karbi ba katei ka jingjia ka la jia ha ka por 12.15 shiteng synñia, na ka liang u waheh shnong u la ong ban lait na kano-kano ka jingjia ïa ki nongshong shnong ka dorbar shnong ka la khang pyrshah ïa ki nongshong shnong ban mih miet mih ïong.
