Shillong, Naitung 28
U Myntri ka Sorkar Jylla, Bah Kyrmen Shylla u la ong ba ka jingjur eh jong u ‘lapbah ‘lapsan ha Meghalaya ka lah ban long ka dawbah kaba lah ban wanrah ïa ka jingjah rngai jong palat 4,000 metric ton u dewïong, kumba la kdew ha ka kaiphod ba shipor kaba 31 kaba la ai da u Justice (Retd) BP Katakey hakhmat ka Meghalaya High Court dang shen.
Katkum ka jingong jong u (Retd) NP Katakey, ka jingjur palat jong u slap ha ka jylla ka lah ban wanrah ïa ka jingshah rah noh u dewïong, ha kaba la shem jingeh ban tip la ka jingjah jong u ka dei na ki daw jong ka mariang ne ki kam beaiñ.
Haba kren sha ki lad pathai khubor ha ka Lah Sngi U Blei, u Bah Kyrmen Shylla u la ong ba watla um pyrshang ban pynksan ïalade ne na ka bynta ka jylla hynrei u la pynkynmaw pat ba ka Jylla Meghalaya ka dei kawei na ki Jylla kaba jur bha u slap bad ong ba lehse, namar kane kano-kano ka jingjia ka lah ban jia.
“Lada phi kynmaw ka la don kawei ka jingkynnoh kaba kdew ba namar ka khyndew bad namar ka jingjur jong u slap ha Meghalaya, ka la wanrah ka jingshlei um ha Assam bad khamtam ha East Jaiñtia Hills, baroh ka um ka leit sha Bangladesh. Phim lah ban tip namar ka jingjur u slap, u dewïong u la shah rah noh kane ka daw ka long kaba jur bha namar ba ka jylla ka don ka jinghap slap kaba bun tam,” la ong u Bah Kyrmen.
Da kaba pynpaw ruh pat ba um don jingtip kaba biang ban pynthikna la ka jingjah jong u dewïong ka dei namar ki kam be-aiñ ne ki daw jong ka mariang.
“Hynrei watla katta ruh, ngam lah ban ong. Ngam lah ban kynnoh tang ïa u slap. Ka lah ban long ne kam lah ban long kumta. Ngam don kano-kano ka jait jingtip kaba bniah bad ban ong hato ka don ne em kaei-kaei kaba be-aiñ hynrei namar ba ngi don ka bor ban peit ïa kane, kam dei ban don kano kano ka jait kam be-aiñ haba ïadei bad ka jingtih ne ka jingkit ïa u dewïong. Ka dei ban ïaid katkum ki aiñ,” ong u Bah Kyrmen.
U la bynrap ruh da kaba ong ba namar ka Jylla ka dei kaba jur bha u slap, kumta ka long kaba eh ban ong la ka dei kaba la shah rong ha u slap ne la don ba kit ïa u dewïong da kano-kano ka jait jingkit kaba long be-aiñ.
Halor ka jingkynnoh ba don ka jingtih bad jingshalan dewïong beaiñ kaba dang ïaid haduh mynta ha Meghalaya, u Bah Kyrmen u la ong ba donkam ïa ki sakhi kiba skhem ban pynshisha ïa kine ki jingkynnoh da kaba bynrap ba ki don ki tnat bapher-bapher kiba don ka jingkitkhlieh ban tohkit ïa kum kine ki jingkynnoh bad ban pynthikna ïa ki jingshisha.
“Hynrei nga ngeit ba ki briew jong ngi lada ka dei na ka bynta ban im ki lah ban leh be-aiñ lym kumta ym don ba kwah ban leh ïa kino-kino ki rukom be-aiñ ha kaba ka lah ban pynthut ïa ka jylla ne tang na ka bynta ka jingsngewbha kin ym leh ïa kino-kino ki kam be-aiñ,” bynrap u Myntri.
U Myntri u la pyntip ba ka jingpynbna jong ka Sorkar ïa ka jingtih marpoh khyndew da kaba pyndonkam da ki rukom stad saïan ka long kaba la pdiang sngewbha da ki paidbah, bad kin ym leh ïa ki kam be-aiñ kiba lah ban ïalam sha ka jingshah jingpynshitom ha ka aiñ.
Kum ban shu pynkynmaw ba ha ka 25 tarik Naitung, ka Meghalaya High Court ka la bthah ïa ka Jylla ba kan shimkhia bad ban buh jingkitkhlieh ïa ki briew ne ki heh kiba hapoh ka jingpeit jong ki ïa u dewïong uba palat 4000 metric ton uba la jah rngai na ka shnong Rajaju bad Diengngan bad ban wad ïa ki briew kiba la donkti ban shim ne rah ïa une u marpoh khyndew.
