Shillong, Naitung 28
U nongïalam ka United Democratic Party (UDP) uba dei ruh u Myntri Sorkar, Bah Kyrmen Shylla ha ka Lah Sngi U Blei u la ban biang ba ka ‘Meghalaya Land Transfer Act’ bad ka Khyrnit ba 6 ki ai ka jingïada kaba khlaiñ na ka jingwan rung kyrthep.
Kine ki lad jingïada ki buh jingeh haduh katta-katta ïa ki bym dei ‘riewlum ban ïoh jaka ha ka Jylla khlem ki kot ki sla kiba biang.
“Haba ïadei bad ka jingwan rung kyrthep, ngi long kiba la kyrkhu ban don ïa ka ‘Land Transfer Act’ bad ka Khyrnit ba 6 ha kaba lada don mano-mano kiba nabar kiba kwah ban wan sah ha ka Jylla jong ngi, kaba kongsan tam ban don ka long ba ki donkam ïa ki kot kiba biang. Khamtam lada dei u bym dei ‘riewlum, ka long kaba jwat haduh katta-katta ïa ki ban wan bad nangta ban kurup ïa ka jaka jong ngi namarba la ïada bha ïa ngi,” la ong u Shylla haba kren sha ki nongthoh khubor.
“Khlem artatien, ngi kwah shuh ïa ki lad jingïada haba ïadei bad ka Inner Line Permit (ILP) lane ka Meghalaya Residents Safety and Security Act (MRSSA) lane kano-kano ka jingïada, ngi donkam eh hynrei kumba ka long mynta, ngim donkam ban tieng namar ngi don ïa baroh kine ki jingïada khamtam eh ïa ka ‘Land Transfer Act’,” u la ong haba ban jur halor ka jingdonkam ban long kiba peitngor ban khang lad ïa ka jingwan rung (bym donkam) jong ki briew nabar shapoh ka Jylla.
Ha kawei pat ka liang, u Bah Shylla u la pynithuh ïa ka jingduna kaba khraw haba phai sha ki lad jingïada na ka jingwan rung kyrthep kiba nabar, da kaba kdew ïa ka jingïashongkha hapdeng ki briew kiba nabar bad ki nongshong shnong trai muluk kum ka lad na bynta ki bym dei nongshong shnong ban ïoh rung shapoh ka Jylla. Katkum ka jingong jong u, ïa kane ka jingeh lah ban weng lada ka imlang-sahlang ka ïatreilang ban khang lad ïa kum kine ki jingjia.
“Kumba nga la kdew na ka por sha ka por, ka jingeh ka long ba haba don kiba wan sha ka jaka jong ngi bad nangta ki ïa poikha bad ki para kynthei jong ngi bad kumta ki ïoh lad ban rung bad kata ka dei ka bynta kaba eh ïa ngi ban ïakhun. Lada baroh ngi ïatreilang bad ngim ailad ïa ki, kata ka dei ka jingïada kaba ngi don,” u la pynpaw.
Haba kylli halor ka jingkyndang shnong jong ka Sorkar Assam bad ka jingsheptieng ïoh jia ba don ka jingwan tuid sha Meghalaya, u Bah Shylla u la ban jur halor ka jingdonkam ban pynkhlaiñ ïa ki lad jingïada, ym tang ha East Jaiñtia Hills hynrei ha baroh kawei ka Jylla.
Na ka liang u Myntri u la pynpaw ruh ka jingkyrmen skhem ha ki ophis ba la don lypa jong ka Jylla, ki tnad treikam, ki ophisar, ki pulit, bad ki bor distrik ban ïada ïa ki jingmyntoi jong ka Jylla.
Halor ka jingdonkam ban pynkhlaiñ ïa ki khyrdop talasi ne ‘Infiltration Check Gate’, u Bah Shylla u la ong, “Ka Sorkar ka pyrshang na bynta kata, khlem pep. Kam long kaba donkam ïa nga ban thoh ha kaba ïadei bad kane namarba ka Sorkar ka la dep pyrshang katba lah bad ka tnad ka dang peit ïa kane ka bynta. Nga ngeit ba kaei-kaei kaba ngi don kumba long mynta, kan long kaba bit ba biang ïa mynta.”
