Nongpoh, Naitung 28
Ha kawei ka jingjia kaba la jia ha ka janmiet jong ka Sngi U Blei, uwei u rangbah na ka shnong Umtasor Mawdkhar u la kum hap shapoh ka Wah Umran katba u dang shongkai halor jingkieng ha Ïewsier kaba dang hap hapoh ka jingkhmih jong ka shnong Saiden, Ri Bhoi District.
Utei u rangbah dei ba la tip kyrteng kum u Bah EB Nongshli, 47 snem ka rta bad la ïathuh ba katba u dang shongkai bad la ki paralok, u la kum hap najrong katei ka jingkieng bad shah rong syndon ha katei ka wah haduh ba ym lapdien shuh, wat lada kitei ki paralok ha ryngkat bad ki briew shnong ki pyrshang bad leh shitom ban wad ïa u. Na ka liang u Rangbah Shnong ka Umtasor Mawdkhar, Bah R Mukhim, u la ïathuh ba kane ka jingjia ka dei ha ka por kumba 7 baje eiei janmiet bad tang mar ïa ïoh jingtip halor kane ka bynta, na ka liang ka jong u, u la pyntip noh mar-mar sha ki bor pulit ka thanat Nongpoh bad leit ruh dalade sha katei ka jaka.
U Bah Mukhim u la ïathuh ba na ka liang jong ki briew ka shnong ki la don ruh kiba la ngam sha katei ka wah ban wad ïa utei u rangbah baroh shi miet, hynrei ki khlem lap dien satia, kaba la pynlong ïa ki lem bad ki bor pulit ban pyrshang wad biang ha ka sngi kaba bud ïa utei u rangbah.
Haba ïoh pat ban ïakren bad ka Kong Phyrnai Nongshli, kaba dei ka para arkmie jong utei u rangbah uba hap ha katei ka wah, ka la ïathuh ba utei u hynmen arkmie jong ka u la mih na la ïing dang step da ka jingthmu ban leit peit pynthor. Hynrei dei tad ha ka por janmiet ba ki la ïoh jingtip halor katei ka khubor kaba sngewsih ba u la hap noh sha wah bad mar-mar hi ki la wan ban wad ïa u bad wat lada khlem pat lap ïa utei u rangbah, na ka liang ka Kong Phyrnai Nongshli ka la pynpaw ïa ka jingsngewnguh sha ki paidbah nongshong shnong kiba la don bynta ban ïarap wad ïa utei u rangbah baroh shi miet bad kiba bteng biang ïa ka jingwad mynta ka sngi.
