Mawkyrwat, Naitung 28
Ki pulit ka South West Khasi Hills District ki la ïoh ban kem sa ïa uwei pat u bar jylla halor ka jingkynnoh donkti ban leh be-ijot bad pynïap ïa kawei ka khynnah 12 snem ha u snem 2021 uba dei ruh nongri nongsumar ïa kane khynnah.
U Superintendent of Police ka South West Khasi Hills, Bah B Jyrwa u la pyntip ba katkum ka jingtohkit ïa u Modu Sangma, u nongshah suba ba nyngkong uba la shah kem ha ka 20 tarik Naitung, 2025 hadien palat 4 snem jong ka jingïai bteng ban thwet ïa u bad ha ka jingtohkit u Modu Sangma u la phla ba u la leh ïa kane ka kam runar da ka jingbthah jong u Ratan Das, nongshong shnong ka Borsora uba dei ruh u nongsumar jong katei ka khynnah. La ïathuh ba u Ratan Das u la leh be-ijot ïa katei ka khynnah kham mynshwa bad u la siew pisa ïa u Modu Sangma ban pynïap ïa katei ka khynnah katba u dang leit sha la ka jong ka shnong ha Assam. Hadien kata u Modu Sangma u la phet krad noh na Borsora,” la ong u SP bad bynrap ruh ba u Ratan Das u la shah kem noh ha ki pulit na Borsora ha ka Sngi Saitjaiñ bad mynta ka jingtohkit ïa u ka la ïaid shakhmat.
Katkum ka jingïathuh ki pulit, ha ka 6 tarik u Lber, 2021, kawei ka khynnah kynthei kaba dang 12 snem ka rta ka la jah rngai na ïing la jong ha ka shnong Borsora kaba hap hapoh Ranikor Civil Sub-Division, South West Khasi Hills District ha ka por kumba 5 baje eiei janmiet bad la lap ïa ka met jong ka ha ka sngi kaba bud bad ha ka post mortem la pynthikna ba ka la shah batbor bad shah pynïap.
U SP u la pyntip ruh ba u nongshah suba ba kongsan ba la tip kyrteng kum u Modu Sangma u la phet rieh bad ym shym la lap dien shuh ïa u naduh katei ka por. Hynrei da ka jingtrei shitom ki ophisar kiba tohkit ïa kane ka kam runar ki la ïai bteng ban buddien ïa kane ka kam bad khatduh la lap ïa utei u runar ha ka shnong Byrnihat, Ri-Bhoi District bad da ka jingïarap jong ki pulit na Byrnihat Outpost, la ïoh ban kem ïa u Modu Sangma ha ka 20 tarik Naitung, 2025.
