Shillong, Naitung 28
U MLA ka North Shillong Konstitwensi, Bah Adelbert Nongrum ha ka Lah Sngi U Blei ka 28 tarik u Naitung 2025 u la leit ban ïakynduh ïa u Secretary ka tnat Pule- Puthi u Swapnil Tembe, IAS, ban pan jingshai bad dawa na u ban pynbeit halor ka jingjied ïa kiba mut ban leh ‘interview’ ïa ka post Lecturer bad Assistant Professor ha kiba bun ki kolej sorkar.
Haba kren sha ki lad pathai khubor, u Bah Adelbert u la ong, ba ka don ka jingbym beit ha ka rukom jied ïa ki nongïakhun (candidate) kiba leh ïa ka interview, namar ka jingjied ka long ka bym khuid namar ki don kiba dei hok ban ïoh leh ïa ka ‘interview’ hynrei kim shah jied pat.
U la ong ba ka donkam ban don ka jingkhuid jingsuba ha ka rukom thungkam da kaba pynmih ruh ïa ka rukom jied ïa ki khynnah, namar ki don ki khynnah kiba pass na ki jaka pule bapher-bapher kaba ïapher ka rukom ai ïa ki ‘mark’.
“Ka daw ba u wan ban ïakynduh bad u Swapnil Tembe ka dei hadien ba u la ïoh ïa shibun ki jingujor na ki nongïakhun (candidate) namar ki pynpaw ïa ka jingbymhun ïa kane ka jingkhot ïa ka interview, da kaba kdew ba kane kam long kaba shai bha ha ka rukom thungkam,” la ong u Bah Adelbert.
Haba ïadei bad ki post Lecturer bad Assistant Professor ha kiba bun ki kolej sorkar, u Bah Adelbert u la ong ba kam don kata ka jinglong mar katjuh (Equivalent), namar katkum ka Meghalaya Recruitment Board ka la kren shai kdar ba kan shim ïa kine ki ‘post’ ryngkat ki nongïakhun katkum ka 1:2:5, katba ka jingkhot ‘interview’ pat ka duna ki nombar kaba ym shym la ïaid katkum ki kyndon.
Kumta, u Bah Adelbert u la ong ba ka Board ka dei ban wanrah ïa ka thungkam kaba khuid da kaba pyni ïa ki ‘marks’ jong ki nongïakhun kam kumba la leh ha ka Central Recruitment Board ka Meghalaya Police.
