Shillong, Naitung 28
Ka Seng Samla Mawlai Pyllun (SSMP) ha ka jingïalam jong u President, Bah Samuel Biam, General Secretary, Bah Eddy Majaw ha ryngkat ki dkhot ki la leit ban ïakynduh biang sa shisien ïa u Addl. Chief Engineer (CE) ka tnat Public Health Engineering (PHE), Bah BL Lawai ban buddien ïa ka shithi kaba la jubab na ka liang ka tnat kaba la leit ban dawa da ka kynhun naduh u bnai Ïaïong, 2025 ha kaba ïadei bad ka jingsam um sha ki thliew ïing kaba ju sam tang arsien ha ka shi taïew ïa ka shnong Mawlai.
Na ka liang ka seng ka la pynpaw ba ka jubab lyngba ka shithi ba la phah sha ka seng da ka tnat kam long satia kaba biang na ka bynta ka jingmyntoi ki nongshong shnong ka Mawlai, kumta ka la leit ban kyntu ïa ka tnat ba kan pynurlong ïa ka jingangnud bad ki jingdawa jong ki.
Katkum ki jingmut ba la buh hakhmat da ka seng bad ki bym pynhun satia ïa ka jubab ki long ba ka tnat PHE (GSWSS) kan buh ïa ka sngi ban leit jurip ban thep ïa ki pipe um thymmai na ka bynta ka shnong Mawlai katkum ka jingbun paid ki nongshong shnong bad ka jingheh palat ka shnong. Ka seng ka kyntu ïa ka PHE ba kan ai umbam-umdih ïa ka shnong Mawlai hynriew sien ha ka shi taïew namar kumba ka long haduh mynta, ka jingïoh umbam-umdih ka long tang ar sien ha ka shi taïew katba ki shnong kiba dei shabar ka Mawlai pat ki ïoh umbam-umdih ar sien ha ka shisngi kata ruh baroh shi taïew.
Shuh-shuh, ka seng ka dawa ba ka Mawlai ka dei ban ïoh thik marwei ïa u pipeline ban pynbiang um ïa ka shnong Mawlai. Ka seng ka kyntu ruh ïa ka tnad ban pynbiang ïa ka jingpynpoi umbam kaba bun khnang ba yn lah ban sam sha kiba dang leh thymmai bad ka rukom sam umbam ruh ka dei ban long kaba ryntih sha baroh khlem da ñiew shiliang khmat ïano-ïano ruh.
Na ka liang ka u Addl. Chief Engineer ka PHE bad ki Ophisar, Executive Engineer GSWSS, SDO ki la kular ban shimkhia halor ka jingdonkam ki paidbah jong ka Mawlai bad na ka liang ka Seng ka khmih lynti ba kane ka jingdawa kan urlong noh shen da kaba kyrmen skhem ruh ba ki nong Mawlai kiba pyndonkam um manla ka sngi kin kyrshan lang ïa kane ka mat kaba kongsan na ka bynta jong ki.
