Shillong, Naitung 28
Ha ka janmiet jong ka Lah Sngi U Blei, ki nongïalam bad dkhot ka Khasi Students’ Union (KSU) ki la hiar ban khynra kynsan ïa ki jaka beaiñ jong ki mynder bad ha kajuh ka por ki la kyndang syndon ïa kine ki jaka sah beaiñ.
Kane ka jaka ba la leit ban kyndang da ka KSU ka dei hajan parking Paltan Bazar (Cantonment) markhap bad ki shnong kum ka Mawbah bad Nongsoh-phoh Upper Mawprem.
Ha kane ka jingleit khynra kyndit jong ka KSU, ka la lap ba ki mynder kiba sah ha katei ka jaka kim don ki kot ki sla ba biang kum ki Epic bad kiwei-kiwei, na katei ka ktem la lap ruh ïa ki jingdih pynbuaid kum u drok, u kynja bad kiwei-kiwei de.
Katei ka jaka ka long ruh kaba isaitmet haduh katta-katta. Ka jingjaboh bad jingsma kaba mih na katei ka jaka ka lah ban ktah ïa ka koit ka khiah kiba bun balang. Ki ïing sah jong ki, la long thik kum ki ïing ha slum ki shu ker malu-mala da ki plywood bad synduk kot, ka jaka kaba khim khlem paiñkhana palat 50 ngut kiba sah ha katei ka jaka kaba kynthup ki nongkhaïi drok, kynja, kiwei kiwei, ki nongbylla beaiñ khlem kot khlem sla. Kumta ka seng ka la pynher krad syndon ïa kine ki briew kiba sah beaiñ ha katei ka jaka bad phah lum shi syndon ïa ki tiar ki tar jong ki bad beh mardor na katei ka jaka.
Ka jingtlot bad ka jingbym don ka aiñ kaba paka ban khanglad ïa ki poi wir kan buh jingma ïa ka jaidbynriew rit paid. Namar la shu ïoh mon ban rung laitluid khlem don nongpeit nongjngoh la kine ki briew ki dei kiba kumno bad ki wan naei? Hato ka Jylla khamtam ka bri hynñiewtrep ka dei ka jaka rieh tngen mo jong kiwei pat ki jaidbynriew kiba la sakma? Hato yn shu pdiang mo ba kan shu kylla long ka jaka bret ïa ki briew na kiwei pat ban shu wan shong thap ha ki shnong ki thaw?
Hei Ho! Sorkar Jylla kyndit bynriew shwa ba ka por kan dier, pyntrei kam kloi-kloi noh ïa ka ILP khnang ba ka umsaw jong ki mynder kan ym wan tyllep da kine kiba wan shong wir wan shong thap. Lada kuman bad leh mynthi, sa shim hi ka Sorkar ïa ka jingkitkhkieh lada ki kynrum-kynram kin jia.
“Sorkar Jylla shano kita ki khyrdop talasi mynder bad haduh lano yn shimkhia ïa kane ka mat kaba ktah ïa ka jaidbynriew?,” la pynkut ka kyrwoh khubor na u samla Pynshai Rani, Information and Publicity Secretary ka KSU.
