Srinagar, Naitung 28 (UNI)
Ki bor pahara ha ka Lah Sngi U Blei ki la ïoh ïa ka jingjop kaba khraw hadien ba ki la siat ïap ïa ki lai ngut lehnoh; uwei na ki uba la suba kynnoh ba dei u snar nongsuhbuit halor ka jingthombor ha Baisaran Pahalgam, ha ka jingïather kuli ha ki bynta shaneng ka Dachigam ha ki jaka ba shabar jong ka Srinagar, la ïathuh ki tyllong khubor ba ha khliehduh.
Ki shipai ki la ïoh ïa ka jingjop ha ka sngi ba la sdang ïa ka jingïatai halor ka mat ba ïadei bad ka ‘Operation Sindoor’ ha Ïingdorbar Parliament.
Katba ïa katei ka jingjia la ñiew kum ka jingjop kaba khraw, ki heh Sorkar haduh mynta kim pat lah ban pyntikna ïa ka jingithuh jong kitei 3 ngut ki lehnoh kiba la shah pynïap.
Ki tyllong khubor ba tikna ki ïathuh ba uwei na kiba la shah pynïap u dei u lehnoh Pakistan jong u Lashkar-e-Taiba, Suleiman Shah ba la sin kyrteng kum u Hashim Musa, uba la shah kynnoh kum u snar nongsuhbuit haba ïadei bad ka jingthombor ha Pahalgam ha ka 22 tarik u Ïaïong kaba la ïalam sha ka jingïap jong 25 ngut ki nongjngohkai pyrthei bad uwei u nongshong shnong – kaba la pynlong ïa ka India bad ka Pakistan ban poi ha tduh jong ka thma.
Hadien ka jingshah thombor jong ka Pahalgam, ki pulit ka Jammu & Kashmir ki la pynbna ban ai khusnam T.20 lak sha kino-kino kiba ai jingtip shaphang u Suleiman lem bad ar ngut kiwei de.
Sa ar ngut kiwei de ki lehnoh ki la shah pynïap ha ka jingkhynra mynta ka sngi ha ki thaiñ Harwan ïa kaba ki shipai ki la ai kyrteng kum ka ‘Operation Mahadev’.
Katei ka jingjia ka la jia hynne ka step haba ki kynhun shipai ba ïatreilang ki la sdang ïa ka jingkhynra ha katei ka thaiñ hadien ka jingïoh jingtip ba ki lehnoh kiba don bynta ha ka jingthombor ha Pahalgam ki lah ban leit sha ka thaiñ Dachigam.
Ka kynhun shipai jong ka Chinar Corps kaba ha Srinagar ka la ong ba lai ngut ki lehnoh ki la shah pynïap ha ka jingïasiat kaba jur.
Ki bor pahara ki la ïoh kurup ruh ïa kawei ka suloi M4 bad ki suloi AK-47, ki ‘grenade’ lem bad kiwei ki tiar siat ha katei ka jingïakhun.
