Jowai, Naitung 28
Ka Khasi Students’ Union (KSU) West Jaiñtia Hills District Unit ka la kyntu ïa u Superintendent of Police (SP) ka West Jaiñtia Hills District ba un pynthikna ïa ka jingïaid pahara kaba man ka por ha ka thaiñ Lapangap.
Kane ka jingkyntu ka la wan hadien ka jingkyrpad da ki paid nongrep ka thaiñ kiba la bteng ban mad ïa ka jingshah pynthut, shah byrngem bad shah pyndik ha ki nongshong shnong Karbi naduh ka 25 tarik Jylliew 2025.
Ha ka shithi sha u SP, u President ka seng samla Laitphar Syngkrem u la ong, “Kane ka jingshah pyndik kaba dang ïai bteng ka la wanrah ka jingtieng jingsmiej bad ka jingbym sngew shngaiñ hapdeng ki nongrep kaba la pynshem shitom shibun ïa ki ba kin lah ban pyndep ïa ki kam rep kam riang da ka jingsuk mynsiem bad da ka jingshngaiñ.”
“Halor kine ki jingeh kiba la kdew, ngi kyntu jur ïa ka ophis jong phi ban sngewbha ban phah ïa ki bor pulit ba kin ïaid pahara man ka por ha ka thaiñ Lapangap khnang ban pynthikna na ka bynta ka jingshngaiñ jong ki nongrep bad khnang ban khanglad na kino-kino ki jingshah pynthut nangne shakhmat,” u la bynrap.
Katkum ka jingong jong une u nongïalam ka KSU, ka jingïohi ïa ka jingdon jong ki bor pulit ym tang ba kan wanrah ïa ka jingsngew skhem jong ki paid nongrep hynrei kan ïarap ruh ban pynneh ïa ka shongsuk shong shngaiñ hapoh ka thaiñ.
