Shillong, Naitung 28
Ki khynnah skul jong ka St. Anthony’s Higher Secondary School bad ka Auxilium Girl’s Higher Secondary School, ki la long kum lahduh ha ka 31st State Level Inter School Karate Tournament 2025 ba la pynlong ha ki lai sngi jong ka taïew ba la dep ha Multi Purpose Indoor Stadium jong ka SAI Training Centre, Shillong.
Ha kane ka kynti kaba mynta, ka jingdon ki khynnah skul kiba la wan ban ïashim bynta ka la kynjoh shaduh ka 748 ngut ba kynthup 350 ki kynthei bad 398 ki shynrang na ki 104 tylli ki skul kiba don ha ka jylla kaba dei artad ka rekod jong ka jingwan ïashim bynta kaba heh tam ha ka jingïaid lynti jong kane ka synjuk.
Ïa kane ka lympung la pynïaid da ka All Megha-laya Karate-Do Associa-tion (AMKA) bad la kyrshan lang da ka tnat ïalehkai jong ka Sorkar Jylla.
Ki skul ba la wan ban bat ïa ki kyrdan ba ar (runners up) ki long ka St. Anthony’s L.P. School bad ka Providence School.
Ha katei ka sngi pynkut ïa ka lympung la ïadon lang ruh u Myntri ka tnat Tourism bad uba long ruh u nongaiktien jong ka Sorkar Jylla u Bah Paul Lyngdoh kum u kongsan ha ryngkat u Bah Aibor-lang Shabong, Chief Accounts Officer ka MeECL, Shillong, Bah Finely L. Pariat, General Secretary ka Meghalaya State Olympic Associa-tion bad kiwei kiwei.
Ha kaba kut jong ka jingïakhun phainal baroh, la ïoh ruh pat sa ka jingsam ïa ki takma bad kumjuh ki trophy sha ki nongïalehkai.
Nalor katta, ka AMKA ka la wan ruh shakhmat ban sam ïa ki khusnam ba kyrpang sha ki nongïa-lehkai kynsai kata Best Karateka ha ka Boys Junior la ïoh da u Royal Jayden Laloo na ka Seven Set Higher Secondary School, katba ha ka Boys Senior la ïoh da u Daniel Dabiangbha Warjri na ka St. Anthony’s H.S. School, ha ka Girls Junior la ïoh da ka Princey A. Blah Pohti na ka Pine Mount School bad ha ka Girls Senior la ïoh da ka Iwannaki L. Khongji na St. Anthony’s H.S. School.
