Moscow, Naitung:
Ka Russia ha ka Sngi U Blei ka la sdang pyntreikam ia ki Kad Liengsuiñ ban leit hiar beit-beit sha North Korea, kum ka dak kaba kham jan jong ka jingïadei bad ka paralok jong ka na Asia kaba ai jingkyrshan ia ka Russia hapdeng ka jingleit hiar thma sha Ukraine.
Ka liengsuiñ kaba nyngkong eh kaba her na Moscow sha Pyongyang ba la pynïaid da ka Nordwind Airlines, ka la dei ban kiew ha ka por 1600 GMT bad kan hiar ha ka nongbah jong ka North Korea, kumba 8 kynta hadien kata, ong ka website jong ka kompeni kit liengsuiñ.
Ka Nordwind Airlines — ka dei ka kompeni kaba ju shakri ia ki jaka shong shuti ha Europe shwa ba ka EU kan khang ia ki liengsuin jong ka Russia — ka don ia ki tiket kiba shongdor haduh 45,000 Ruble ($570).
Ka tnat pathai khubor jong ka Russia, ka TASS, ka iathuh ba ka liengsuin, kaba nyng-kong eh, kaba leit sha kawei pat ka liang, na Pyongyang sha Moscow, kan long ha ka Sngi Ba-ar.
Ka tnat kit jingkit jong ka Russia, ka la ong ba ia katei ka lynti yn pynbiang shisien shi-bnai.
Ka Russia bad ka North Korea ki la pynioh biang ia ka jingpyniasoh rel ha ka 17 tarik Jylliew hadien ba la pynsangeh noh ia katei ka jingiateh ha u snem 2020 ha ki por jong ka khlam Covid-19.
Kitei ar tylli ki ri, ki la lah ban wanrah ïa ka jingïadei bad ka jingiatreilang ha ka liang ki tnat shipai ha kine ki snem ba la dep, ha kaba ka North Korea, ka la pynbiang ïa ki shipai bad ki tiar ïakhun thma na ka ka bynta ka Russia, ba kan pyndonkam ha ka jingleit tur jong ka sha Ukraine. Kumta, la ong ba kine ki arliang mamla ki la wanrah ia ka jingïasoi ban ïada mar kylliang ha u snem ba la dep, ha ka por ba u President ka Russia, u Vladimir Putin, u leit jurip sha North Korea.
Kumjuh, la ong ba na ka liang jong ka North Korea, ha ka sien nyng-kong ha u bnai Lber, ka la pynbna ba ka la phah ïa la ka kynhun shipai sha ki jaka ba shakhmat eh ha Ukraine, ha ryngkat ki shipai jong ka Russia ban iatreilang bad ka Russia ha kum kane ka por ba ym shym don ba nud ban pyni ia ka jing-iatreilang bad ka Russia namar ki jingmaham jong ka US bad ki ri ka thaiñ West baroh kawei.
