Shillong, Naitung 28
Ka jingjur jong ki kam tuh kam thiem ka la nang bteng na kawei ka sngi sha kawei pat, ha kaba ki runar ki la ïoh ban rong ei ïa ki tiar ki tar, ka pisa da ki phew hajar bad ruh ban tuh ïa ki arshaka na kylleng ki bynta jong ka nongbah Shillong bad ruh na kiwei ki district jong ka jylla.
Katkum ka khubor kaba la ïoh na ki pulit la ong ba u Koijam Ravikumar Singh u la ai ka jingujor ba ha ka 25 tarik mynta u bnai, ki runar bym lah ban ithuh, ki la tuh ïa kawei ka TV, kawei ka laptop kiba shongdor haduh kumba T.75,000/- bad ruh ka pisa kaba long T.3,000/- na ka jaka sah ka jong u, kaba don ha Nongrimmaw, Laitumkhrah, Shillong.
Ha kawei pat ka khubor shah tuh, u Palasi Dev Nath u la ai ka jingujor ba ha ka 25 tarik mynta u bnai, ha ka por 2 baje shiteng synñia, ki runar bym lah ban ithuh, ki la tuh ïa ka mobile phone ka jong u bad ka pisa kaba long T.10,000/- katba u dang ïohthiah hapoh ka trok (kaba don ïa u registration number WB67-B-4942) kaba la pynïeng ha Mawtnum, harud surokbah NH-6 kaba hap hapoh ka thanat Nongpoh ha Ri-Bhoi. Kumjuh, na ka liang jong u Aminool Islam jong ka MCAB Ltd. Phulbari Branch ha West Garo Hills u la ai ka jingujor ba ha ka 24 tarik mynta u bnai, ki runar bym lah ban ithuh ki la tuh ïa u generator battery na phyllaw jong ka Bank.
Ha kawei pat ka khubor, u Bah Lamiki Rabon u la ai ka jingujor ba ha ka 24 tarik mynta u bnai, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-AD-5332 na Mawlai, Mawkynroh Bypass Road, Shillong.
Nangta, u Patrick Ghosh u la ai ka jingujor ba ha ka miet jong ka 23 tarik mynta u bnai, ki runar bym lah ban ithuh ki la tuh ïa ka arshaka ka jong u na ka thaiñ Upper Mawprem, Shillong.
Ka Kong P Nongkhlaw ka la ai ka jingujor ba ha ka 21 tarik mynta u bnai, ki runar bym lah ban ithuh ki la tuh ïa ka arshaka jong ka, kaba don ïa u registration number ML05-X-1839 na Diengpasoh ha East Khasi Hills.
U Joseph Nongdhar ruh u la ai ka jingujor ba ha ka 16 tarik mynta u bnai, ki runar bym lah ban ithuh ki la tuh ïa ka arshaka jong u, kaba don ïa u registration number ML05-AC-7806 na Mawkhan ha East Khasi Hills.
