Tehran, Naitung:
U Myntri kam bar ri jong ka Iran, ha ka Sngi Nyngkong u la ong ba ka Iran kan ai da ka jubab kaba tyngeh pyrshah ia ka America bad ka Israel lada jia ba ki hiar thma biang ia ka Iran hadien-habud.
Kitei ki jingkynthoh, ki paw ba ki long kum ka jingkynthoh halor ka jingkren jong u President jong ka America, Donald Trump, uba la byrngem ha ki khyndiat por ba la leit, ba un “pynduh noh” ia ka prokram nuclear jong ka Islamic Republic, lada ka sdang biang ia katei ka kam bad kane ka long ruh hadien ka jingleit thombor jong ka US ia ka Iran ha ka taiew ba la dep.
Haduh mynta ym pat lah ban tip haduh katno ka jingjulor ka la mih na ka jinghiar thma jong ka US ia ki karkhana nuclear jong ka Tehran, kaba la jia hadien ba ka Israel ka la pynlong ia ka jingbthei bom kaba kyndit kaba ka la ong ba ka thmu ban khanglad ia ka Iran ban ioh ia u tiar ialeh atom.
Ki jingthombor jong ka Israel ki la pynthut ïa ka jingïakren nuclear jong ka US bad ka Iran kaba la sdang ha u bnai Risaw.
Ha ka jingiaid jong ka thma kaba 12 sngi, ka Iran ka la jubab da kaba siat namding ia ki nongbah jong ka Israel bad ruh ia kawei jaka sah jong ka US kaba don hajan ha Qatar, ka jingkynthoh kaba u Trump u la kyntait mynshwa.
Ha ka jingleit jngoh jong u sha Scotland ha ka Sngi Nyngkong, u Trump u la pynskhem ba ki jinghiar thma ba mynshwa ia ka Iran “ki la pynduh pyndam noh ia ki jinglah jong ki ban shna nuclear”.
Ka International Atomic Energy Agency (IAEA), ka ong ba ka Iran, ka dei tang ma ka ka ri, kaba khlem don tiar nuclear, kaba pynriewspah mynta ia u Uranium, haduh 60%, ka sienjam kaba lyngkot, na ka jingpynriewspah kaba 95%, kaba donkam na ka bynta ka tiar nuclear.
