Shillong, Naitung 29
Ka Shillong Lajong FC ka la bteng ïa ka jingjop ba-ar ha ka lympung ïalehkai 134th Durand Cup, hadien ba ka la lah ban pynliem sa ïa ka Rangdajied United FC da 3-1 kol ha ka Sngi Ba-ar ha Jawaharlal Nehru Stadium, Polo.
Kane ka nam jop ka la wan urlong lyngba u Everbrighton Sana Mylliempdah, Damaitphang Lyngdoh bad u Gladdy Nelcen Kharbuli na ka bynta ban pynlong ïa kane ka kynhun hapoh ka jingïalam u Birendra Thapa ban ïoh 6 point na ki ar sien ïakhun bad kumjuh ban ïai bteng ïa ka jinglam khmat ha ka Group-E.
Kane ka long ka jingïai bteng jingjop ka Lajong naduh ba la lah ban pynliem haduh 6-0 kol ïa ka Armed Forces Football Team (ATM FT) na Malaysia ha ka Sngi Saitjaiñ.
Kumba ka paw kane ka jingïalehkai ka la long kaba itynnad namar baroh ar kynhun ki dei kiba paw bha ha ka Shillong Premier League. La sakhi ïa kane ka jingïalehkai haduh phra hajar tam ki paidbah kiba la pyndap ïa ki jaka shong ha katei ka stadium.
Wat lada kine ki kynhun ki la ïoh ïa ki kabu kiba biang hynrei kim shym la lah ban thep kol. Ha shwa ban kut ka jingïalehkai jong ka kylla step, ka Shillong Lajong ka la ïoh ban pynkhih jar nyngkong eh lyngba u Sana.
Hadien katto-katne por ba la bteng ïa ka jingïakhun ha ka kylla miet, ka Rangdajied ka la lah ban pynïakhaid kylla lyngba u Mebanshngaiñ Kurkalang ha ka minit kaba 58. Da kane ka jingïakhaid ka la pynlong ïa kane ka jingïakhun ban nang kham itynnad shuh shuh, hynrei tang hadien 8 minit ka Lajong ka la thep biang ïa ka kol ba ar lyngba u Damaitphang.
Ha shwa ban wai ka Lajong ka la thep biang sa shi kol lyngba u Gladdy ha ka minit kaba 80 bad ban jop shi syndon.
Kumta ka Shillong Lajong kan ïa tynjuh bor pyrshah ïa ka NorthEast United FC, kaba long ka lahduh jong ka aïom ba la dep ha ka 8 tarik u Nailar, katba ka Rangdajied ïa ka Malaysian Armed Forces ha ka 5 tarik.
