Nongpoh, Naitung 29
Uwei u rangbah ba la tip kyrteng kum u Dlas Shadap, 41 snem ka rta, kurim jong ka Kong Iunika Bamon na Umshangktad, kawei na ki shnong khappud ha Ri-Bhoi District u la shah bom jem bad shah kyrdem ha ki runar bym lah ban ithuh ha phyllaw ïing lajong haduh ba um tip briew shuh ryngkat ka jinglyngkieñ ka snam ha madan haduh ba u la mynsaw jur na ki bynta jong ka khlieh bad shadem.
Katkum ka jingtip ba la ïoh lum la ong ba kane ka jingjia ka la jia ha ka 26 tarik mynta u bnai bad ïa katei ka jingjia la lap da ka kurim jong u, ka Kong Iunika Bamon ha ka por 4 baje mynstep kaba thiah lang ha syndah ha kajuh ka ïing bad kaba sngew lyngngoh ka long ba ka kurim ka khlem ïohsngew eiei halor ka jingshah tied shah bom bad shah kyrdem u kurim lajong bad phlei snam ha madan.
Katkum ka jingïathuh ka kurim, la ong ba u kurim jong ka u la buaid ha katei ka miet bad don ba wan buh ïa u bad ha katei ka por ka don bad u hynmen jong ka bad u la phah khat ja ban ïa bamja lang, hynrei hadien ba u la dep bamja, u la kynroi ïa ka hynrei ka la leit ban thiah noh namar ba ka samthiah palat.
Ka la ïathuh ruh hadien ba ka la ïohthiah kam don jingtip shuh ïa kaei kaba jia bad kam shym la ïohsngew eiei ïa kata ka jingshah shoh shah bom jong u kurim, hynrei dei tad 4 baje mynstep ba ka la khie namar ka jingshitom u khun ka la lap pynban ba u kurim jong ka, u la thiah ha phyllaw ryngkat ka snam bad pyntip mar mar sha ki bahaïing halor katei ka jingjia.
Ka la ïathuh ruh ba ha ki por mynshuwa ka la ju don ka jingïashoh bad ka kmie jong ka namar kum ka ïing ka sem kim suk ïa ka jingïapoikha jong ki.
Na ka liang u Bah Plas Shadap, para trai jong utei u rangbah ba shah shoh, u la ïathuh bad katkum ka jingtip ba ïoh ha ka Sngi Saitjaiñ kaba dei ka step 26 tarik ha ka por 5 baje eiei lyngba u kthaw kurim jong utei u hynmen jong uba shah shoh, u la pyntip ba u Bah Dlas um tip briew shuh bad mar-mar kum u para u la pyntip sha ki pulit ka Mawlasnai Police Outpost halor katei ka jingjia bad la pynkit noh mar mar sha Bhoirymbong CHC. Pynban namar ka jingmynsaw kaba jur ki doktor ki la phah pynkit noh sha NEIGRIHMS namar ki bynta jong ka khlieh ki la pait bad kumjuh ruh ki bynta jong ka shadem bad kum ka ïing ka sem ki dawa na ka bor pulit ba ki dei ban shimkhia ïa kane ka kam khnang ban ym ailad ïa kum kitei ki runar bad ki kam sniew ba kin kharoi khamtam ban thmu shim wat ïa ka jingim briew.
U la ong ruh ba kane ka jingshah shoh u hynmen jong u ka dei ka jingshoh dusmon bad kaba la palat bad haduh mynta u dang don ha jaka sumar ha ICU jong ka NEIGRIHMS khlem pat tip briew satia bad kum ki bahaïing ki la ujor ruh da ka ejahar ha Mawlasnai Police Outpost ban leh ïa kaba donkam, bad u la ïathuh ba ki pulit ki dang phone bad kylli ïa u mynta ka 29 tarik halor ka jinglong jingman utei u rangbah naduh ba kila dep buh ïa ka FIR.
Na ka liang u Bah Batskhem Sohtun, Rangbah Shnong ka Umshangktad u la ïathuh ba ka shnong ka kwah ban pynshai halor katei ka jingshah shoh dusmon utei u rangbah bad naduh katei ka sngi kaba jia kaba ki pulit ki wan shaw ïa utei u rangbah ki khlem wan mih shuh sha katei ka shnong.
U la ong ruh ba kane ka jingshah shoh ka la jia na ka por sha ka por, namar dang ha ki khyndiat bnai ba la dep ka la don ka jingïashoh bad ka kiaw jong u ha kaba ka la ksih bad thmu ban pynïap ïa u, hadien katto-katne por ka la jia biang sa kawei ka jingkynad ha kaba utei u rangbah u la shah dait biang ha ka kiaw kurim ha ki bynta ka shadem bad kiwei-kiwei ki bynta bad kum ka shnong ka la sneng bad kyntu ba un kynriah noh na katei ka ïing namar kam long kaba shngaiñ ba un shong sah ha katei ka ïing.
U la ïathuh ruh ba na ka liang ka ïing ka sem jong katei ka kiaw kurim jong u ka la don shibun ki jingjia bad ki khana pateng (history) kiba pynjah burom ïa ka shnong ka thaw bad lehse kiba shoh ïa utei u rangbah ki dei na katei ka juh ka ïing namar dang ha kine ki khyndiat snem katei ka kiaw kurim ka la shim ruh ïa ka mynsiem jong ka kmie lajong kaba la 80 snem tam ka rta.
Kum ka shnong ka pynrem jur ïa kitei ki jingjia bad ka byrngem byrsit jong katei ka briew ïa ki nongshong shnong namar ka la wanrah ruh ka jingshong syier ïa ki paidbah. Dang ha kine 2 ne 3 sngi ka la byrngem ruh ban lynthem maw ïa kawei ka longkmie ha katei ka shnong bad kum ka shnong ka la kyrpad ïa ki bor ka aiñ ban shimkhia ban kem ïa katei ka briew bad lada lap ba dei katei ka juh ka ïing kaba donkti ïa katei ka kam, na ka liang ka shnong kumba la ju ïakren bad ki paidbah kan sa shim syndon da ka rai ban beh shnong shisyndon ïa ki namar ba katei ka briew kam ju salia ban pynmih kino-kino ki jingkulmar bad wat ki khun ki tieng thod- thod ïa la ka jong ka kmie, bad namar ka jingpynkulmar bad leh ki kam thawsha naduh ki por ba mynshuwa haduh mynta bad lehse kiba donkti ban dusmon ïa utei u rangbah ki dei na kajuh ka ïing bad ai ba ki bor pulit kin pynkhlaiñ ka jingtohkit ban lap ïa ki briew ba donkti ha katei ka kam, u la bynrap.
Hynrei haduh mynta ki pulit kim pat ïoh kem ïano-ïano wat la ki bahaïing ki la dep ban ujor ïa ka ejahar naduh katei ka sngi ba shah bom utei u rangbah.
