Shillong, Naitung 29
U samla Alpon Nongrum u dei u rangïa-lehkai ba kyrpang namar na ka jinglong ka met ka phad ha kaba u don ka jingduna ha ka kti kadiang, u la ïoh ban ïashim bynta sha ka First Prize Money Badminton Tour-nament ba la pynlong da ka Badminton Promotional Group, naduh ka 24 haduh ka 26 tarik mynta u bnai ha Indoor Sports Hall jong ka JN Stadium, Polo.
Pynban wat hapdeng kane ka jingduna kam shym la khanglad ïa u ha kane ka jingïaid lynti ha ka kam ïalehkai badminton.
Kane kam dei ka sien kaba nyngkong ba un mih madan, hynrei u la ïakhun teng ha ki lympung ïalehkai ba la dep kum ka State Championship kaba la long ha Nongstoiñ bad ruh ha ki snem ba la leit.
U Alpon u la ïashim bynta ruh ha ka Paralympic bad u long khlur ïaleh badminton uba tbit bad u la lah ban wanrah khusnam.
