Shillong, Naitung 29
U nongïalam ka BJP bad Myntri Sorkar Jylla, Bah A.L. Hek ha ka Sngi Ba-ar u la kam ba ka Meghalaya Residents Safety and Security Act (MRSSA) ka biang eh ban tehlakam ïa ka jingwan rung kyrthep kiba nabar sha kane ka Jylla bad ba ka jingwanrah da kawei pat ka lad jingïada kan ym da long than eh kaba donkam.
“Ka sobjek ka long kajuh. Ngi kwah tang ban tehlakam ïa ka jingwan rung kyrthep. Lada ngi don ïa kane ka rukom treikam (MRSSA), balei ngin kwah sa da kawei pat,” la ong u Bah Hek haba kren sha ki nongthoh khubor.
Katkum ka jingong jong u, ka MRSSA ka dei ka lad treikam kaba paka bha ban tehlakam ïa ka jingwan tuid jong ki briew sha Meghalaya.
“Ka MRSSA ka dei ka lad jingïada kaba bha ban tehlakam ïa ka jingwan rung kyrthep, ban pyntikna ïa ka jingshngaiñ jong ki nongjngohkai pyrthei bad ki trai shnong kumjuh,” u la ong.
U Myntri u la pyntip ruh ba ka MRSSA ka ai bor ïa ki Dorbar Shnong lem bad ki trai ïing ban khmih bniah ïa ka jingwan rung kyrthep, ha kawei ka liang kaba ïada ïa ki jingmyntoi jong ka Jylla.
“Lyngba ka MRSSA, ngi pynkupbor ïa ki Dorbar Shnong bad ki trai ïing ban peitngor ïa ka jingwan rung kyrthep,” u la ong.
U Bah Hek u la bynrap ba ïa ka jingtyrwa ban pyntreikam pura ïa ka MRSSA yn sa ïakren hapoh ka jingïalang ka Kynhun Myntri.
