
Shillong, Naitung 29
Ka Sorkar Jylla ka la pynbna ba kan sa sdang noh mardor ban pynlong noh ïa ka Khyndai Lad kum ka jaka ïaid kjat tang na ka bynta ki paidbah, hadien ba la lah ban pynkynriah ïa ki nongdie madan kiba shong ha ka surok Khyndai Lad sha ka jaka ba la buh kyrpang ha ka jaka ïeng kali ha MUDA.
Hadien ka jingïalang kaba la long bad u Symbud Myntri Rangbah uba peit ïa ka tnat Pynroi Sor (Urban Affairs), u Bah Sniawbhalang Dhar ha ka Sngi Ba-ar, u Myntri ka tnat jngohkai pyrthei, Bah Paul Lyngdoh, u la pynbna ba ka Sorkar ka la rai ban pynlong mardor ïa ka Khyndai Lad kum ka jaka ban shah tang ïa ki paidbah ban ïaid kjat.
“Ka jingpynlong jaka ïaid kjat yn sdang noh mardor bad ka por ban shah ïaid kjat kan long naduh 7 baje mynstep haduh 9 baje mynmiet. Yn khang lut ïa ka jingïaid kali na ka bynta katei ka jaka, naduh ka jingïeng kaba long na ka jaka rung ban rung sha Khyndai Lad haduh Umsohsun. Tang ki kali ba don pass ban wan pynhiar ïa ki khynnah skul ha ki sngi long skul kin shah ban rung. Ha ki sngi shuti pat, ym shah satia ïa kino-kino ki kali ban rung hapoh katei ka jaka lait noh tang lada donkam palat kaba ym lah ban kiar kum haba don ka jingpluh ding ne ka jingïarap ha ka koit ka khiah,” la ong u Bah Paul haba kren sha ki nongthoh khubor.
U la pynbna ruh ba ka Shillong Municipal Board (SMB) kan sa pynmih ‘pass’ sha ki nongshong shnong kiba sah ha katei ka bynta ban ai lad ban rung kali ha ka por ba pynlong jaka ïaid kjat.
“Haba ïadei bad kane, ngi la bthah ïa ka SMB ba kan lum jingtip halor ki nongshong shnong jong katei ka bynta khnang ban lah ban ai ‘pass’ sha ki ban rung kali. Kane ka ‘pass’ kan long tang sha ki nongshong shnong ha katei ka jaka, ym ban ai sha kito kiba na bar hynrei ba don dukan ne kiba don kam lajong ha Khyndai Lad,” la ong shuh shuh u Myntri.
U Bah Paul u la pynpaw ruh ïa ka jingsngewhun jong ka ïing kashari jong ka jylla halor ka rukom treikam ba ka Sorkar ka la leh da ka jingïadei bad ka jingpynkynriah ïa ki nongdie kiba shong madan sha ka jaka ba la pynkhreh kyrpang, kaba la pynkup bor ïa ka jingïaid lynti jong ki paidbah ha ka bynta kaba heh tam jong ka thaiñ.
“Ka dei ban long ka jingïoh jingtip ba ha kiwei ki bynta jong ka ri, lada kynriah ïa ki nongdie kiba shong madan, ki ai tang jaka. Hynrei ha Shillong, ha kane ka kynti kaba mynta, ka Sorkar ka la ai ruh ïa ki jingdonkam kum ka bording kaba biang, khnang ban pynsuk ïa ki nongdie,” la bynrap u Myntri.
Ha kaba ïadei bad kiwei ki jingtei, u Bah Paul u la pyntip ba ka Sorkar ka la ai pisa ban sdang noh mardor ïa ka jingtei jong 15 tylli ki jaka leit pynjhieh ha khrum jong ka MUDA complex bad ka jingshakri um dih ruh yn sa buh.
U la ong ruh ba ha ka 5 tarik Nailar, u Symbud Myntri Rangbah bad ma u kin sa ai hi dalade ïa ki cheque ba T.10,000 sha manla ki nongdie madan.
Haba kylli, u Bah Paul u la ong ba ka Sorkar ka don ka jingthmu ban pynbha lut ïa ka Khyndai Lad, da kaba shna surok da ki tile, ban buh ïa ka saiñ ba pyni ïa ka jingpdiang sngewbha bad pyntynnad dur ïa ka jaka.
“Ka Khyndai Lad kan sa long ka jaka na ka bynta ki nongtem nongput bad ki jingrwai, ban pynpaw ïa ka dur jong ka Shillong kum ka Music Capital jong ka ri India,” la pyntip u Myntri.
U la bynrap ruh ba ka Sorkar kan sa buh ïa ki “tourist buddies” ban long kum ki nongïalam ïa kiba wan jngoh-kai, ki nongïarap ïa ki nongwan jngohkai, bad ban peit ruh ïa ka jingshngaiñ, ka jingkhuid jingsuba bad ka jingïarap ha ka por jingeh.
Haba jubab ïa kawei ka jingkylli, u la ong ba ka jingshah kynriah jong ki nongshong die madan ha Khyndai Lad ka long kaba jop bad kane ka khana kaba la urlong yn sa pynthikna ha kiwei pat ki jaka kum ha Laitumkhrah bad Civil Hospital Point.
“Ngi hap ban sdang na Khyndai Lad namar ka dei ka jaka ba heh tam bad kaba bun kam tam ha ka jylla. Haba la jop ha Khyndai Lad, ngin sa pynpaw ïa ka jingjop sha kiwei pat ki jaka kum ka Laitumkhrah, Civil Point bad kiwei ki jaka kiba khapngiah,” la kular u Bah Paul.