New Delhi, Naitung 29 (UNI)
Haba bteng ïa ka jingïakren ha ka sngi ba ar jong ka jingïatai halor ka ‘Operation Sindoor’ ha Lok Sabha, u Myntri ka tnad kam pohïing ka Sorkar Pdeng, u Amit Shah ha ka Sngi Ba-ar u la pyntip sha ka Ïingdorbar Lok Sabha ba baroh lai ngut ki lehnoh kiba donkti ha ka jingthombor ha ka 22 tarik u Ïaïong ha Pahalgam ki la shah pynïap noh hynnin ka sngi ha ka jingkhynra lang jong ki bor pahara.
Haba ïadei bad ka jingkhynra jong ki bun tylli ki tnad treikam ba la pynïaid shakhmat da ki bor pahara ka ri, u Shah u la ong, “U Modi, lyngba ka ‘Operation Sindoor’, u la pyntikna ba la pynduh pyndam ïa ki nongsuh buit jong ka jingthombor ha Pahalgam. Bad hynnin ka sngi, ha ka ‘Operation Mahadev’, ki lehnoh kiba donkti ha kane ka jingthombor ki la kyllon ïap.”
Da kaba kyntait ïa ki jingkynnoh ba la pynpaw da u nongïalam ka Liang Pyrshah, u Shah u la kdew ïa ki jingtip ba bniah halor ka ‘Operation Mahadev’ kaba la pynlong lang da ki shipai India, CRPF, bad ki pulit ka Jammu & Kashmir.
Katei ka jingkhynra ka la ïalam sha ka jingkhyllem jong u Suleman, uba ju khot sin u Faisal Jatt, u Hamza Afghani, bad u Jibran – baroh kiba don jingïadei bad ka Lashkar-e-Taiba (LeT) bad kiba donkti ha ka jingthombor ha Baisaran Valley, Pahalgam, kaba la ïalam sha ka jingïap jong 26 ngut ki ‘riew paidbah, ba kynthup ïa uwei u nongshong shnong ka Nepal.
“U Suleman u dei ‘Commander’ ha ka thup ‘A-Category’ jong ka Lashkar-e-Taiba (LeT), uba donkti ha kiba bun ki kam thombor ba kynthup ïa kito ha Pahalgam, Hamle, bad ha Gagan Top. Ki tnad syntiat jong ngi ki don ki sabut kiba skhem halor ka jingdonkti jong u,” la ong u Shah.
U la bynrap ba u Hamza Afghani bad u Jibran ruh ki dei ki lehnoh heh kyrdan bad ki dkhot ba shah thwet haba ïadei bad ki kam jong ka LeT.
Haba kynthoh ïa u nongïalam ba rangbah ka Congress bad Myntri kam pohïing barim, u P. Chidambaram halor ka jingbuh jingkylli ïa ka tynrai jong ki lehnoh ba la shah pynïap, u Shah u la ong, “Hynnin ka sngi, u Chidambaram u la kylli kaei ka jingpynshisha kaba ngi don ba kine ki lehnoh ki wan na Pakistan. Kaei kaba u pyrshang ban pynshisha? Ïano u pyrshang ban ïada?”
U la kynnoh ïa ka Congress ba ka pyntlot ïa ki jingpyrshang ka India ha ka liang ka jingpahara bad ka pyrshang ruh ban buh jingartatien halor ki kam pyrshah lehnoh kiba jop.
“Ka long kaba sngewsih haduh katta-katta ba u Myntri kam pohïing barim u buh jingkylli halor kiba kum kine ki sabut. Da kaba leh kumta, u nongïalam ka Congress u ai ïa ka jingsait khuid ïa ka Pakistan,” la bynrap biang u Shah.
Haba jubab ïa ka jingkam jong u nongïalam ka Liang Pyrshah, u Rahul Gandhi ba ym shym la don mano-mano na ka Sorkar kiba la leit sha Pahalgam hadien jong ka jingshah thombor, u Shah u la ong “Hadien ka jingshah thombor ha ka 22 tarik u Ïaïong, nga la leit sha Srinagar ha kajuh ka sngi ban peit ïa ka jinglong-jingman ha ka liang ka jingshngaiñ bad ban pyntikna ba ki lehnoh kin ym lah ban phet krad. U Modi u la lum ïa ki jingïalang Cabinet Committee on Security (CCS) ha ka 23 bad 30 tarik u Ïaïong.”
U la kynthoh shuh-shuh ïa ka Congress namar ka jingpynïaid jong ka ïa ka histori ba ïadei bad ki buit myntoi ba kongsan ka India, da kaba ñiew ïa ka ‘Indus Waters Treaty’ kum ka “jingbakla kaba khraw,” bad pynpaw ba u Myntri Rangbahduh ka ri, u Modi naduh kata ka por u la shim ïa ki sienjam ba radbah da kaba sospon noh shi syndon ïa kane ka jingïateh.
Shuh shuh u Shah u la ïada ïa ka jingkren jong u Myntri ka tnad kam bar-ri ha Lok Sabha hynnin ka sngi bad u la pynpaw ïa ka jingsngewkhia kaba jur halor ka jingbym shaniah ïa ka bor riti-synshar ka ri bad buh jingkylli halor ka nongrim ka Liang Pyrshah haba ïadei bad ki kam bar-ri.
