Raphael Warjri
Kine ki san tylli ki bor tynrai pynman jynthaw ba don jingim ki don la ka bhah ban kyrsoi kylla ha ka khyndew, haduh ban da man ki jynthaw kum ki sngem sohpailen, ki bthuh tit kiba suki suki ki kylla dur bad sa man dieng ki siej, ki khlaw ki btap bad ki jynthung laiphewjait. Ha kajuh ka rukom la kyrsoi na ka khyndew sa ki wieh ki ksaiñ ki ba suki suki ha ka jaka ba ki seilung, ki san ki plung la man shwa ki khñiang ki ksiah bad ter ter la wandur ban man sa ki japieh, ki lun, ki sher ki shalynnai. Na kawei pa kawei na kine ki jynthaw la man kiba sei kti sei kjat na ka metbah kaba don ka khlieh. Ynda ki la nang san shuh shuh la don kiba kylla sha ki mrad sawkjat ba par ha khyndew, don kiba la sei thapñiang bad man ki sim ki doh ba her ha suiñ, hynrei kiwei kiwei ki ïaineh tang da ki shnet kum ki dohkha dohpnat ba jngi ha um,bad kum ki jakoid ki hynroh kiba im lang ha ryngkew bad ha um. Nalor kine la don ruh kiba byrshem kawei ka jait na kawei pat ba la man ki lymbit ki labadur kiba don ka metbah kum ki mrad ryngkew hynrei ki mih thapñiang kum ki sim bad ki lah ban her. Kine kiei kiei baroh ki phalang kum ki puriskam ha ka deiriti Khasi bad man la ka khana ka don ka jingshisha ba lah ban ïakop bad ka jinglong ha ka juk mynta ruh. Kaba shynna tam na kine dei ka khana shaphang ka ïew luri lura, ha kaba ki ksew ki la ioh ïa ka sap ban ïew bad sma dien ïa baroh ki jynthaw ha pyrthei namar ba ki para mrad baroh ki la ïuh roit ïa ka tungtoh tungrymbai jong ka Dom ka ksew kynthei kaba lam ban die ha ka ïew. Ka khnatang shaphang u bnai bad ka sngi ruh ka dei kaba sngew lyngngoh ba ki longshwa manshwa ki iathuh ba u bnai u la phetrieh sha lyndet na ka sngi hadien ba u la shah kawang da u peisieh, ha kaba ka stad maïan mynta ka lap shisha ïa u dpei ha ryngkew jong u bnai.
Nalor kine kiei kiei la don ruh ki khana puriskam shaphang u ñiangtyrkhang u ba ïada ïa ki bynriew na ka khlam, ka tyngab kaba kylla iong hadien ba shah tap da u khiew ranei, ka phreit ka lmun ban puh kba ha trai pyntha kba, u klew u kyndeh u kynjih tang shu mih sngi namar ba u babe ba u la thmu ban klim ïa la ka tnga, ka sngi. Nangta kumno ba ka paitpuraw ka saw ka tdong ba tah da ka snam ka rakot da u siej jaseng; kumno ba ka ñiangkongwieng ka pah ban khot ïa ka synrai; kumno ba ka lymbit ka phet ban rieh tngen markylliang hapdeng ki mrad bad ki sim, haduh ba ym ioh ban im ha ryngkew ha khlaw ne ha suiñ bad ki sa shongneh ha krem ha kroh. Lada jer kawei pakawei ki don shi byllien ki khanatang bad puriskam kiba don ka snap jingshisha katkum ba lap ka stad maïan jong ka juk mynta. Kumta lada bishar sani ïa ka khanatang shaphang kaba thaw ïa ka pyrthei ruh ka don ka jingshisha ha ka stad maïan mynta ka ba ha ka ktien phareng ki jer da ka ‘Big Bang Theory’ lane kata ka Pur-Bthei ne Pyrthei. Ha ba la kyan kha ka meiramew la pur bad bthei haduh ban da mih ki bor maïan ba pynman jynthaw ba don jingim kata ka sngi, u bnai, ka lyer, ka um bad ka ding.
Nalor ki puriskam na ki khñiang, ki ksiah, ki mrad ki mreng lane wat haduh ki metbneng, ki don ruh ki khana puriskam na ki jynthung ruh. Kumno ba u syiar khraw jutang u don ka juban bad ka lamet latang, u diengsning ba kin ioh bynta ha ka kñia ka khriam; kaba ïashun u sohkhia bad u sohmynken bad kumjuh ruh ka mluh bad u sying, haduh ba la mih ka kyntien ïashun thlongmluh thlongsying. Nangta ka kpong ba la khlei juban u skhen, u kdait, ka khlieng, ha kaba la man ka ryntieh, u khnam ha ka ksaw ka kpong bad hadien la kylla ka byrngia rongbiria. Kine kiei kiei ki khana ki don ka jingshisha ha ka pyrthei ba ngi im haduh ka juk mynta. Ha kane ka bynta ruh lada jer ki don shibyllien ki khana ba donkam ka jynthoh la ka jong, kaba dei thik tang ïa ki puriskam ki parom. Kine baroh kiba la ïa pur khana ki dei ka deiriti tynrai Khasi ba man la ki bynriew ha la shimet ne ha ka kynhun, lada dei ha ka longïing longsem ne ka kur ka jait lada kyllum ha ka imlang sahlang ki dei ban sngewtrai ïa la ka thymmei deiriti lajong. Shuh shuh wat ki khana shaphang ki ksuid ki khrei, u thlen ka shwar, ka taro, ki suidtynjang, u kla, ka rakot, ka langtyrkhiah, ka thapbalong bad kiwei kiwei ki don la ka bhah ha ka puriskam bad parom Khasi kiba ym tangba ki long ki khana ki ba sngewtynnat ban sngap, hynrei ki don ki jingsneng bad ka khubor ban sam ha ka imlang sahlang. Nangta sa ki marryngkew marramew, kum ka shun, ka nar, ka isbad, ka laha, ka bthing, ka khyndew ka shyiap, ki mawlong mawteh, ki mawramsong, kumjuh ruh ki lhuh ki kharai, ki rsham ki riat ki ram, ki khlaw ki btap ki don la ka bhah ha ki khana puriskam kiba don ryngkat bad ka jingsneng lane ka khubor kaba phalang ïa ki pharshi shaphang ka longbriew manbriew ha ka imlang sahlang naduh kulong kumah haduh mynta mynne.
