Shillong, Naitung 29
U Myntri Sorkar ka Jylla bad nongïalam ka BJP, Bah A.L. Hek, u la thoh sha u Myntri Rangbah ka Chhattisgarh, u Vishnu Deo Sai, ban kyrpad pyllait noh mardor ïa 2 ngut ki Sister ka Balang Katholik na Kerala kiba la shah kem ha ka 25 tarik u Naitung, ha Durg Railway Station.
Kane ka jingshah kem ka long katkum ka ejahar kaba la ujor da ka Bajrang Dal, halor ka jingkynnoh kam khaïi briew bad ka jingpynkylla niam jubor.
Ha ka shithi jong u, u Bah Hek u la pynpaw ka jingsngewkhia halor katei ka jingshah kem bad kyrpad ïa u Sai ban shim ïa ki sienjam kiba biang eh ban tohkit halor katei ka kam.
“…katkum ka jingïakren lyngba ka ‘telephone’ bad phi ha kaba ïadei bad ka jingshah kem ba dang shen jong 2 ngut ki Sister, nga kwah ban kyrpad ïa phi bad ka ophis babha jong phi ban pyllait noh mardor ïa ki 2 ngut ki Sister kiba la shah kem na Durg Railway Station ha ka 25 tarik u Naitung, 2025 katkum ka ejahar ba la ujor da ka Bajrang Dal,” u la thoh.
“Da ka jingsngewkhia kaba jur, nga kyrpad rit ïa phi bad ïa ka ophis babha jong phi ban pyllait noh mardor ïa kitei ki Sister bad ban shim ki sienjam kiba biang ban tohkit halor ki daw bad ka jingktah jong kane ka kam bad katkum ka jingtip jong nga bad nga ngeit ba ka Balang kam shym la leh ïa kano-kano ka jingpynkylla niam da ka bor hynrei la ai ïa ka jingshakri kaba bha tam sha ka longbriew-manbriew bad nga ai khublei shi kat dei halor ka jingkular jong phi ban pyllait noh kloi ïa ki,” la bynrap u Bah Hek.
Haba kylli, u la pynpaw ba u Myntri Rangbah (Sai) u la kular ïa u ban shim ïa baroh ki sienjam kiba donkam na bynta ban pyllait noh mardor ïa ki Sister.
“U Myntri Rangbah u la sngewkmen shibun bad u la ong ïa nga ba un shim ïa baroh ki sienjam ban pyllait noh mardor ïa ki 2 ngut ki Sister. Kata ka dei ka jingkular ba la ai da u Myntri Rangbah. Mynta ka sngi, nga phah sha u ïa kane ka shithi kumba la ïakren bad u na ka bynta ka jingpyllait ba mardor ïa 2 ngut ki Sister,” u la bynrap.
Katei ka jingshah kem, ka la pynmih ïa ka jingïakynad ha ka saiñ pyrthei, ha kaba ki seng ka liang pyrshah, ki la kynthoh ïa ka Sorkar BJP ha Chhattisgarh.
Na ka liang ki nongïalam ka Congress bad ka CPI(M) ki la dawa ban pyllait noh mardor ïa ki Sister, da kaba kynnoh ba la pynshitom beiñ ïa ki rit paid hapoh ka jingsynshar ka BJP.
Shuh shuh u Rahul Gandhi bad ka Priyanka Gandhi ki la kren ruh halor katei ka jingshah kem jong ki Sister, da kaba ong ba ka dei ka jingthombor ïa ka jinglaitluid ha ka niam ka rukom.
