Shillong, Naitung 29
Ka Meghalaya State Karate-Do Federation (MSKDF) ka la pynkut noh ïa ka lympung ïalehkai ba la tip kum ka 4th Meghalaya State Level Karate-Do Championship 2025 ha ka 26 tarik mynta u bnai ha MSMA Training Centre, Laitkor Kynton-U-Mon.
Ha kane ka lympung ïalehkai kaba la neh ar sngi kynthih la wan shim bynta da 100 ngut ki khynnah na kylleng ki district jong ka jylla.
Ïa ka nam lahduh ha kane ka lympung la rah da ka East Khasi Hills District, ka East Jaiñtia Hills District ka la wan ba-ar bad balai ka West Khasi Hills District.
Ïa kane ka lympung la plie da u Bah D. Ranee, Chairman ka MSMA bad la sam ïa ki khusnam da u Bah John Khyriem.
Kat kum ka kyrwoh ba la pyllait da u D. Warjri, Secretary ka MSKDF, la ong ba ki nongjop ha kane ka lympung ki la shah jied ban mihkhmat ïa ka Jylla sha ka All India Karate Independence Cup bad ka All India Zendokai Championship 2025 ki ban sa long ha u Risaw mynta u snem.
