Shillong, Naitung 29
Ki Nongrep kiba don da ki phew ngut na kylleng ki District bad kiba don hapoh ka shatri jong ka Hill Farmer’s Union (HFU) ki la wan ban tur kynsan sha Secretariat da kaba shong hakhmat ka khyrdop ban ïoh pynsngew sha ka Sorkar halor ki mat jingdawa kiba kum ki nongrep ki don.
Na ka liang ki Nongrep ki la buh shiphew tylli ki mat jingdawa na ka Sorkar kiba kynthup ïa ka jingdawa ban pyntreikam ïa ka Market Intervention Scheme ha kum kane ka por ba ki mar rep ki hiar dor shaba palat kaba la wanrah ka jingduhnong kaba khraw ïa ki nongrep, ka jingdawa ban mang pisa na ka bynta ban ai jinghikai ïa ki Nongrep halor kumno ba kin pyndonkam ïa ki sboh ban ïarap ïa ki Nongrep kiba shah lynshop ki mar rep jong ki ha ka bor mariang, ban pynjlan biang ïa ka por thied synsar ïa kaba la leh da ka Sorkar khnang ba kan long ka jingmyntoi ïa ki Nongrep nalor kiwei kiwei pat ki mat jingdawa.
Na ka liang ka Myntri kaba dei khmih ïa ka tnat ka Rep ka Riang ka Sorkar Jylla, ka Kong Ampareen Lyngdoh, ka la khot ïa ki Nongïalam ka kynhun sha ka kamra jong ka ha Secretariat ha kaba ha kane ka jingïakynduh, ka jingïakren ka la neh kumba 2 kynta 20 minit eiei.
Haba ïoh ban ïakren bad u General Secretary ka Hill Farmer’s Union, Bah Alfonbirth Kharsyntiew hadien ka jingwan ïakynduh ïa ka Myntri, u la ïathuh ba ka Sorkar Jylla kam pat lah ban rai ne ai jingkular eiei halor ki mat jingdawa ba la pynsngew da ki Nongrep hynrei na ka liang ka Sorkar kan sa khot biang da ka jingïalang hapdeng ka Myntri, ki ophisar Sorkar bad ki Nongrep ban weng ïa ki jingeh jong ki Nongrep.
Haba ïadei bad ka jinghiar dor shaba palat ki mar rep, ka Myntri ka la ong ba kane ka mat ïakren kaba eh bha bad yn nym lah ban ai jubab hak-dak.
Haba ïadei pat bad ka jingdawa ka kynhun ban pyntreikam ïa ka Market Intervention Scheme, ka Myntri ka la ong ban lum shwa ïa ki jingkheiñ jong ki Nongrep bad na ka liang ka Sorkar kan sa peit ïa ka jingdonkam ka mang tyngka na ka bynta kane khnang ba ki Nongrep kin lah ban ïoh jingïarap lyngba kane ka skhim ban pyndep ïa ki ram ki shah jong ki.
Halor ka jingshah ot kilo ki mar rep, ka Myntri ka la ong ba kane ka aiñ ka don hapoh ka Khasi Hills Autonomous District Council (KHADC) bad ong ruh ba ka long kaba kloi ban leit sha ka Council ban leit ïakynduh ïa u CEM ka KHADC ban pynsngew halor kane ka bynta.
“Ha kaba ïadei bad kane ka jinglum ïa ki jingkheiñ na ka bynta kiba shim ïa ka ram, ka Myntri ka la ong ba kan ai por shibnai ïa ki ophisar bad ha kaba ïadei bad kiwei kiwei ki mat pat, ngin sa shong (jingïalang) hapoh ka lai bnai”, ong u Bah Kharsyntiew.
Shuh shuh, u Bah Kharsyntiew u la ïathuh ruh ba shen un sa pan por na u CEM ka KHADC ban ïoh ïakynduh bad ban ïakren sani bha halor ki jingeh kaba kum ki Nongrep ki ïakynduh na ka por sha ka por.
