Washington, Naitung:
Katkum ki khubor, la ong ba ki nongialam ka Thailand bad ka Cambodia ha ka Sngi U Blei ki la mynjur ban iakynduh lang ha Malaysia na ka bynta ka jingiakren ban pynsangeh noh ia ka jingiakynad, hadien ba u President ka US- Donald Trump u la trei shitom ban pynkut noh ia ka jingiakynad hapdeng kitei ki ri.
La ong ba ka jingiakynad hapdeng kitei ki ri kaba la neh kumba 4 sngi tam, ka la shim ia ka jingim jong palat 34 ngut ki briew bad kumba 168,000 tam ki la kylla phetwir bad sakma namar katei ka jingiakynad.
U Jirayu Huangsap u la ong ba u Myntri Rangbahduh ba shipor jong ka ri- u Phumtham Wechayachai, un sa leit sha ka jingiakren ha ka Sngi Nyngkong kum ka jubab halor ka jingkhot jong u Myntri Rangbahduh ka Malaysia u Anwar Ibrahim ban iakren halor ki jingpyrshang ban wanrah ia ka jingsuk ha katei ka thaiñ.
U nongaiktien u la ong ruh ba u paralok jong u Phumtham na Cambodia, u Hun Manet ruh un wan sha katei ka jingiakren, wat la ia kane ym shym la pynthikna mardor na ka liang jong ka Cambodia.
U Trump, ha ka Sngi Saitjaiñ u la thoh hapoh ka Truth Social jong u, ba u la ioh ban ïakren bad ki nongïalam jong ka Thailand bad ka Cambodia bad u la maham tyngeh ruh ia ki ban ym iatreilang shuh bad ki ha ka liang ka khaïi-pateng bad kitei ki ri lada kim sangeh noh ia ka jingiakynad khlem da pynslem shuh. Bad hadien kata u la ong ba baroh arliang mamla ki la mynjur ban iakynduh ban iakren ia ka jingsangeh thma.
U Myntri Rangbahduh jong ka Cambodia, Hun Manet, u la ong ha ka Sngi U Blei ba ka ri jong u ka la mynjur ban bud ia ka “jingsangeh thma mardor bad khlem jingteh kyndon.” U la ong ba u Trump u la iathuh ha u ba ka Thailand ruh ka la mynjur ban pynsangeh ia ki kam thombor hadien ka jingiakren jong u Trump bad u Myntri Rangbahduh ba shipor jong ka Thailand- u Phumtham Wechayachai.
